ترقی و خوشحالی کیلئے ہمیں اخلاص کے ساتھ آگے آنا ہوگا:وفاقی وزیرسید عمران احمد شاہ

جمعرات 31 جولائی 2025 19:20

کوئٹہ (اُردو پوائنٹ اخبارتازہ ترین - اے پی پی۔ 31 جولائی2025ء) وفاقی وزیر برائے تخفیف غربت و سماجی تحفظ سید عمران احمد شاہ نے طالبات کیلئے مزید سکالرشپس کا اعلان کرتے ہوئے کہا ہے کہ دہشتگردی و بدامنی سے پاک پاکستان ہی پیغام پاکستان ہے، پاکستان و بلوچستان کی ترقی و خوشحالی کیلئے ہمیں اخلاص کے ساتھ آگے آنا ہوگا۔ ان خیالات کا اظہار انہوں نے خواتین کاروباری افراد کیلئے پائیدار ماحول کے عنوان سے منعقدہ سیمینار سے خطاب کرتے ہوئے کیا۔

اس موقع پر وزیر مملکت برائے تعلیم و پیشہ ورانہ تربیت وجہیہ قمر، اسپیکر بلوچستان اسمبلی کیپٹن(ر) عبد الخالق اچکزئی،ڈپٹی اسپیکر بلوچستان اسمبلی غزالہ گولہ، صوبائی وزیر تعلیم راحیلہ حمید درانی، سیکرٹری ویمن ڈویلپمنٹ ڈیپارٹمنٹ سائرہ عطاء، پاکستان پاورٹی ایولیشن فنڈ کے چیف ایگزیکٹو آفیسر نادر گل بڑیچ بھی موجود تھے۔

(جاری ہے)

سید عمران احمد شاہ نے کہا کہ بلوچستان و پاکستان کی ترقی و خوشحالی کیلئے اپنی جان کا نذرانہ تک پیش کر سکتا ہوں ،وزیر اعظم شہباز شریف کی ہدایت پر قائد کے وژن خوشحال بلوچستان ترقی یافتہ پاکستان لیکر آیا ہوں، انہوں نے اعلان کیا کہ بلوچستان یونیورسٹی، گرلز کالج پشین و کوئٹہ کے طالبہ کیلئے سکالرشپس دیں گے، ایک بیانیہ پیغام پاکستان جس میں ہم سب کو اپنا حصہ ڈالنا چاہیے، دہشتگردی و بدامنی سے پاک پاکستان پیغام پاکستان ہے، ہمارے بچوں، بچیوں، یوتھ پڑھے لکھے لوگ، صوبائی خودمختاری پیغام پاکستان ہے، دنیا دیکھے گی کہ پاکستان ایک طاقت ہے مودی اور بھارت کی خطے میں مزید بدمعاشی نہیں چلے گی ۔

صوبائی وزیر تعلیم راحیلہ حمید درانی نے کہا کہ محنت کا سلسلہ جاری رکھا جانا چاہئے جب سیاست میں قدم رکھا اور پہلی بار عملی طور پر انتخابات میں حصہ لیا تو بہت سی مشکلات کا سامنا کرنا پڑا۔