Live Updates

خیبر پختونخوا میں رواں ہفتے بارشوں کے نئے سلسلے کی پیش گوئی، پی ڈی ایم اے ہائی الرٹ

جمعرات 31 جولائی 2025 19:50

پشاور (اُردو پوائنٹ اخبارتازہ ترین - اے پی پی۔ 31 جولائی2025ء) محکمہ موسمیات نے خیبر پختونخوا میں رواں ہفتے بارشوں کے نئے سلسلے کی پیشنگوئی کے بعد صوبائی ڈیزاسٹر مینجمنٹ اتھارٹی نے کمراٹ اور دیر کے لیے گلیشیائی جھیل کے پھٹنے (گلاف) اور فلیش فلڈ کا الرٹ جاری کر دیا ہے۔پی ایم ڈی کے مطابق صوبے کے مختلف علاقوں میں اس دوران وقفے وقفے سے بارش اور گرج چمک کے ساتھ طوفانی بارش جبکہ کہیں کہیں تیز بارش کے امکانات ہیں۔

(جاری ہے)

ان موسمی حالات کے باعث گلیشیائی علاقوں خصوصاً کمراٹ اور دیر میں گلاف اور اچانک آنے والے سیلاب (فلیش فلڈ) کے خطرات بڑھ سکتے ہیں۔پی ڈی ایم اے نے متعلقہ تمام اداروں کو ہدایت کی ہے کہ وہ کسی بھی ممکنہ جانی و مالی نقصان، مال مویشیوں کے ضیاع اور فصلوں و بنیادی ڈھانچے کو پہنچنے والے نقصان سے بچاؤ کے لیے پیشگی حفاظتی اقدامات یقینی بنائیں۔ تمام محکموں کو ہائی الرٹ رہنے اور بروقت حفاظتی انتظامات کرنے کی ہدایت جاری کی گئی ہے۔