سرمایہ کاری کی دعوت دینے سے پہلے مقامی سٹیک ہولڈرز سے مشاورت ضروری ہے ، لیہ اپیکس باڈی

جمعہ 1 اگست 2025 15:48

لیہ (اُردو پوائنٹ اخبارتازہ ترین - اے پی پی۔ 01 اگست2025ء) بھارت کے غیر قانونی زیرتسلط جموں و کشمیر میں لیہ اپیکس باڈی نے مودی حکومت کی طرف سے مقرر کئے گئے لداخ خطے کے لیفٹیننٹ گورنر کویندر گپتا پر سرمایہ کاروں کو خطے میں سرمایہ کاری کی دعوت دینے سے پہلے مقامی سٹیک ہولڈرز سے مشاورت پر زوردیاہے ۔کشمیر میڈیا سروس کے مطابق لیہ اپیکس باڈی اور کارگل ڈیموکریٹک الائنس کے ساتھ مل کر بھارتی حکومت کے ساتھ چار نکاتی ایجنڈے پر بات چیت کر رہی ہے۔

چار نکاتی ایجنڈا ریاستی حیثیت کی بحالی ، لداخ کے لیے چھٹے شیڈول ، وقف پبلک سروس کمیشن اور دو پارلیمانی نشستوں پر مشتمل ہے ۔لیہ اپیکس باڈی کے شریک چیئرمین چیرنگ دورجے نے لیہ میں میڈیا سے گفتگو کرتے ہوئے کہا کہ نئے تعینات ہونے والے لیفٹیننٹ گورنر کو پہلے مقامی سٹیک ہولڈرز سے بات کرنی چاہیے، تاکہ وہ لداخ خطے ، اس کے مسائل اوروہاں کےلئے موزوں صنعتوں کے بارے میں معلومات حاصل کرسکیں۔

(جاری ہے)

انہوں نے کہاکہ کویندر گپتا کو مقبوضہ علاقے کوپوری طرح نہیں جانتے ہیں اور ضروریات کومدنظر رکھے بغیر غیر ملکی یا مقامی سرمایہ کاروں کو سرمایہ کاری کی دعوت دینا بہت خطرناک ہے۔ انہوں نے واضح کہاکہ ہم سرمایہ کاری کے خلاف نہیں ہیں، لیکن لداخ میں لگائی جانےوالی نئی صنعتوں سے مقبوضہ علاقے کے ماحول کو نقصان نہیں پہنچنا چاہیے۔انہوں نے کہاکہ صنعتوں کے لئے زیادہ پانی کی بھی ضرورت ہوتی ہے جبکہ مقبوضہ علاقے کو پہلے ہی پانی کی قلت کا سامنا ہے۔