Live Updates

ضلعی انتظامیہ کی جانب سے پشاور میں 15 روزہ ’’پاک صاف خیبر پختونخوا‘‘ مہم جاری

ہفتہ 2 اگست 2025 15:04

پشاور (اُردو پوائنٹ اخبارتازہ ترین - اے پی پی۔ 02 اگست2025ء) ضلعی انتظامیہ پشاور کی جانب سے 15 روزہ صفائی مہم ’’پاک صاف خیبر پختونخوا‘‘ کو کامیاب بنانے کےلیے شہر بھر میں اقدامات کیے جا رہے ہیں۔ضلعی انتظامیہ کے مطابق شہر کے مختلف علاقوں میں صفائی، نکاسی آب کی بہتری، عوامی آگاہی واک/ مہمات کا سلسلہ جاری ہے۔

(جاری ہے)

ڈپٹی کمشنر پشاور سرمد سلیم اکرم کی نگرانی میں ضلعی انتظامیہ، کیپٹل میٹرو پولیٹن گورنمنٹ، ٹاؤن انتظامیہ، سول ڈیفنس، پی ڈی اے اور دیگر متعلقہ محکموں کی ٹیمیں مختلف علاقوں میں متحرک ہیں، اس دوران گلیوں، بازاروں، سرکاری دفاتر، سکولز اور ہسپتالوں میں خصوصی صفائی کا عمل جاری ہے۔

اس کے علاوہ عوام میں صفائی سے متعلق شعور اجاگر کرنے کےلیے واکس، مساجد میں اعلانات اور سوشل میڈیا مہم بھی جاری ہے تاکہ شہریوں کو صفائی کی اہمیت سے آگاہ کیا جا سکے۔ ڈپٹی کمشنر پشاور سرمد سلیم اکرم نے کہا ہے کہ یہ مہم صرف حکومتی نہیں بلکہ ہر شہری کی مشترکہ ذمہ داری ہے، ہم سب کو مل کر اپنے شہر کو صاف رکھنا ہے۔ انتظامیہ نے عوام سے اپیل کی ہے کہ وہ کوڑا کرکٹ مقررہ جگہوں پر ڈالیں، تجاوزات سے گریز کریں اور صفائی عملے سے تعاون یقینی بنائیں تاکہ پشاور کو ایک صحت مند اور خوبصورت شہر بنایا جا سکے۔