رواں برس محروم رہ جانیوالے عازمین آئندہ سال اضافی رقم ادا کیے بغیر حج پر جائیں گے، معاملات طے

نجی حج آپریٹرز کی نمائندہ تنظیم نے یقین دہانی کرادی، ذرائع مذہبی امور نے بھی اس پیشرفت کی باقاعدہ تصدیق کردی

ساجد علی ہفتہ 2 اگست 2025 17:35

رواں برس محروم رہ جانیوالے عازمین آئندہ سال اضافی رقم ادا کیے بغیر ..

اسلام آباد ( اُردو پوائنٹ اخبارتازہ ترین۔ 02 اگست 2025ء ) پاکستان سے نجی سکیم کے تحت رواں برس حج سے محروم رہ جانے والے عازمین کو آئندہ سال بغیر اضافی رقم کے حج کا موقع ملے گا، اس سلسلے میں معاملات طے پاگئے۔ میڈیا رپورٹس کے مطابق نجی سکیم کے تحت رواں سال حج سے محروم رہ جانے والے ہزاروں عازمین کیلئے ایک اہم پیشرفت ہوئی ہے، وفاقی وزیر مذہبی امور نے بھی اس پیشرفت کی باقاعدہ تصدیق کی ہے، جس کے تحت یہ عازمین آئندہ برس بغیر کسی اضافی رقم کے حج ادا کر سکیں گے۔

اس حوالے سے ذرائع کا کہنا ہے کہ نجی حج آپریٹرز کی نمائندہ تنظیم حج آرگنائزیشن ایسوسی ایشن پاکستان (ہوپ) نے وزارت مذہبی امور کو یقین دہانی کرائی ہے کہ رواں سال حج سے رہ جانے والے 25 سے 26 ہزار عازمین کو آئندہ سال حج پر بھیجا جائے گا اور ان سے دوبارہ کوئی اضافی رقم وصول نہیں کی جائے گی کیوں کہ مذکورہ عازمین کی طرف سے جمع کروائی گئی رقم اب بھی سعودی عرب میں محفوظ ہے، سعودی عرب کے بینکنگ سسٹم میں ”والٹ“ اکاؤنٹس کے تحت ان عازمین کے تقریباً 490 ملین سعودی ریال (تقریباً 36 ارب پاکستانی روپے) موجود ہیں۔

(جاری ہے)

ذرائع کی جانب سے بتایا گیا ہے کہ گزشتہ سال دعویٰ کیا گیا تھا کہ 67 ہزار کوٹہ مکمل استعمال ہوا، تاہم درحقیقت صرف تقریباً 63 ہزار کا حج کوٹہ ہی استعمال ہو سکا تھا، نجی آپریٹرز کی جانب سے اس کوٹے پر مکمل بکنگ نہ ہونے کے باعث ہزاروں عازمین حج سے محروم رہ گئے، سینیٹ کی قائمہ کمیٹی برائے مذہبی امور پہلے ہی وزارت مذہبی امور اور نجی حج آپریٹرز کو اس غفلت کا ذمہ دار قرار دے چکی ہے، اس معاملے میں چیئرمین قائمہ کمیٹی نے واضح کیا کہ حج سے رہ جانے والے ہزاروں پاکستانیوں کی محرومی کی اصل وجہ وزارت اور نجی آپریٹرز کی ناقص کارکردگی تھی۔