پاکستان، ایران کا آزاد تجارتی معاہدہ دونوں ممالک کیلئے ترقی کی راہیں ہموار کریگا ، صدرکاٹی

پیر 4 اگست 2025 20:18

کراچی (اُردو پوائنٹ اخبارتازہ ترین - اے پی پی۔ 04 اگست2025ء) کورنگی ایسوسی ایشن آف ٹریڈ اینڈ انڈسٹری(کاٹی)کے صدر جنید نقی نے پاکستان اور ایران کے مابین مذاکرات کے نتیجے میں وزارتی سطح پر 12معاہدوں پر دستخط کو خوش آئند قرار دیتے ہوئے کہا ہے کہ دونوں ممالک کے درمیان برادرانہ اور تجارتی تعلقات کو فروغ حاصل ہوگا ، جس سے عوامی سطح پر معاشی خوشحالی اور ترقی کی نئی راہیں کھلیں گی۔

پیر کو جاری اعلامیہ کے مطابق انہوں نے کہا کہ ایران اور پاکستان کے درمیان دیرینہ تعلقات ہر گزرتے دن کے ساتھ مضبوط ہورہے ہیں۔

(جاری ہے)

انہوں نے کہا کہ دونوں ممالک کے درمیان تجارتی حجم کو بڑھانے کیلئے ٹیکسٹائل، فارما سیوٹیکل، لیدر اور فوڈ پروڈکٹس کے شعبے میں وسیع مواقع موجود ہیں جبکہ پاکستان ایران کی سستی توانائی سے استفاہ حاصل کر سکتا ہے۔ انہوں نے کہا کہ حکومت مقامی تاجر و صنعتکاروں کو ایران میں تجارت کے مواقع تلاش کرنے میں خاص طور پر معاونت فراہم کرے اور حائل رکاوٹوں کو دور کرنے کیلئے دونوں ممالک کو حکومتی سطح پر اقدامات کی ضرورت ہے۔ صدر کاٹی نے کہا کہ معاہدہ سے ٹیرف میں کمی، تجارتی رکاوٹوں کے خاتمہ سمیت دونوں ممالک میں کاروباری شعبہ کی ترقی میں مدد ملے گی۔