ملک و قوم کی بقا کی خاطر جانوں کا نذرانہ پیش کرنے والے عظیم سپوتوں کو ہمیشہ یاد رکھا جائے گا،کمشنرراولپنڈی

پیر 4 اگست 2025 21:40

راولپنڈی (اُردو پوائنٹ اخبارتازہ ترین - اے پی پی۔ 04 اگست2025ء) کمشنر راولپنڈی ڈویژن انجینئر عامر خٹک نے کہا کہ شہداء پولیس ہمارے محسن ہیں،قوم ان کی مقروض ہے، شہداء کی عظیم قربانیاں باعث فخر ہیں، شہداء ہمارا اثاثہ ہیں جن کی قربانیاں لازوال ہیں،راولپنڈی پولیس کے 122 افسران و جوانوں نے ملک و قوم پر جان قربان کی،سربلندی کی یہ دستار ہمارے پاس شہداء کی امانت ہے،ملک و قوم کی بقاء کی خاطر جانوں کا نذرانہ پیش کرنے والے ان عظیم سپوتوں کو ہمیشہ یاد رکھا جائے گا۔

ان خیالات کا اظہار انہوں نے یوم شہداء پولیس،پولیس لائینز راولپنڈی میں منعقدہ تقریب سے خطاب کے دوران کیا۔تقریب میں آر پی او بابر سرفراز الپا، کمشنر راولپنڈی انجینئر عامر خٹک، سی پی او سید خالد ہمدانی، ڈپٹی کمشنر حسن وقار چیمہ، ایس ایس پی انویسٹیگیشن، ایس پی ہیڈکوارٹرز، ڈویژنل ایس پیز، ایس ڈی پی اوز، ایس ایچ اوز سمیت سینئر افسران نے شرکت کی۔

(جاری ہے)

اس موقع پر شہداء پولیس کےموقع پر شہداکے ایصال ثواب کے لیے پولیس لائینز جامع مسجد میں قرآن خوانی کی گئی۔ یادگار شہدا پر سینئر افسران کی آمدکے موقع پر پولیس کے چاق و چوبند دستے نے سلامی پیش کی، سلامی کی تقریب میں شہداء کی فیملیز نے بھی شرکت کی،سینئر افسران اور پولیس کے چاق و چوبند دستے نے سلامی پیش کی۔ افسران نے یاد گار شہداء پر پھول رکھے، شہداء پولیس کے درجات کی بلندی اور ملک و قوم کی سلامتی کے لئے دعا کی گئی،سینئر افسران شہداء کی فیملیز سے ملے، بچوں سے شفقت کا اظہار کیا۔