مسلسل 40 روز تک اسمبلی اجلاس سے غیر حاضری، شیخ وقاص اکرم کی رکنیت ختم کرنے کی تحریک پیش

اگرکوئی رکن 40 دن غیرحاضررہے تو اس کیخلاف کوئی بھی ایم این اے نشست خالی قراردینے کی تحریک لاسکتا ہے، تحریک منظور ہونے پر غیر حاضر رکن کی نشست خالی قراردے دی جائے گی؛ سپیکر کی رولنگ

ساجد علی منگل 5 اگست 2025 13:32

مسلسل 40 روز تک اسمبلی اجلاس سے غیر حاضری، شیخ وقاص اکرم کی رکنیت ختم ..

اسلام آباد ( اُردو پوائنٹ اخبارتازہ ترین۔ 05 اگست 2025ء ) قومی اسمبلی اجلاس سے مسلسل 40 روز تک غیر حاضری پر پی ٹی آئی کے ایم این اے شیخ وقاص اکرم کی رکنیت ختم کرنے کی تحریک پیش کردی گئی۔ تفصیلات کے مطابق قومی اسمبلی کے اجلاس کے دوران سپیکرقومی اسمبلی سردار ایاز صادق نے رولنگ دی کہ شیخ وقاص اکرم 40 روزسے مسلسل ایوان سے غیرحاضرہیں، اگرکوئی رکن چالیس دن تک غیرحاضررہے تو اس کے خلاف کوئی بھی رکن قومی اسمبلی نشست خالی قراردینے کی تحریک لاسکتا ہے اور وہ تحریک منظور ہونے کی صورت میں غیر حاضر رکن کی نشست خالی قراردے دی جائے گی، بطور سپیکر ایوان کو آئین اور قواعد سے آگاہ کر رہا ہوں، قواعد و ضوابط ملک عامر ڈوگر کو دی جائیں۔

اس پر تحتیک انصاف کے رکن ملک عامر ڈوگر نے کہا کہ ’یہ رول جو آپ نے پڑھا ہے بتا دیں آج تک کس نے قواعد پر عمل کیا ہے؟ ہمارے اراکین یہاں پارلیمنٹ ہاؤس سے گرفتار کیے گئے، یہاں جو ظلم ہو رہا ہے ہمارے اراکین کو جیلوں میں ڈالا جا رہا ہے‘، سپیکر قومی اسمبلی نے جواب دیا کہ ’ہم نے پروڈکشن آرڈر جاری کیے ہیں‘، جس پر ملک عامر ڈوگر نے کہا کہ ’یہ ہمارا حق ہے‘، ایاز صادق نے سوال کیا کہ ’یہ حق 2018ء سے 2022ء تک کہاں تھا؟‘، پی ٹی آئی رکن نے کہا کہ ’یہی ماحول رہنا ہے تو پارلیمان کو تالا لگا دیں‘۔

(جاری ہے)

بتایا گیا ہے کہ سپیکر کی رولنگ کے بعد صدر ینگ پارلیمنٹیرینز فارم و رکن قومی اسمبلی سیدہ نوشین افتخار کی جانب سے پاکستان تحریک انصاف رکن قومی اسمبلی شیخ وقاص اکرم کی قومی اسمبلی کے اجلاسوں سے متواتر 40 دن بغیر درخواست دیئے غیر حاضری پر اسلامی جمہوریہ پاکستان کے آئین کے آرٹیکل نمبر 64 کی شک نمبر 2 کے تحت تحریک پیش کی جس میں شیخ وقاص اکرم کی رکنیت ختم کرنے کا مطالبہ کیا گیا۔