Live Updates

موسلادھار بارش کے باعث ملک کے مختلف علاقوں میں ندی نالوں میں پانی کے بہائو میں اضافے کا امکان ہے، محکمہ موسمیات کا انتباہ

منگل 5 اگست 2025 22:51

اسلام آباد (اُردو پوائنٹ اخبارتازہ ترین - اے پی پی۔ 05 اگست2025ء) محکمہ موسمیات نے انتباہ جاری کرتے ہوئے کہا ہے کہ منگل کی رات اور 6 اگست کے دوران موسلادھار بارش کے باعث دیر، سوات، شانگلہ، مانسہرہ، کوہستان،ایبٹ آباد، مری، گلیات اورکشمیر کے مقامی /بر ساتی ندی نالوں میں پانی کے بہائو میں اضافے کا امکان ہے،موسلادھار بارش کے باعث اسلام آباد/راولپنڈی، گوجرانوالہ، لاہور ،سیالکوٹ کے نشیبی علا قے زیر آب آنے کاخدشہ ہے، عوام الناس کو احتیاط کی ہدایت کی گئی ہے،خیبرپختونخوا کے پہا ڑی علا قوں ، گلگت بلتستان،کشمیر، مری اور گلیات میں لینڈ سلائیڈنگ کے باعث ٹریفک کی آمدورفت متاثر ہونے کا خطرہ ہے۔

محکمہ موسمیات کے مطابق آئندہ 24 گھنٹوں کے دوران خیبر پختونخوا،اسلام آباد ،بالائی پنجاب اورکشمیر میں تیز ہوائوں اور گرج چمک کے ساتھ بارش جبکہ چند مقامات پر تیز/موسلادھار بارش کی بھی توقع ہے۔

(جاری ہے)

ملک کےجنوبی علاقوں میں موسم گرم اورحبس برقرار رہنے کا امکان ہے۔ محکمہ موسمیات کے مطابق کل (بدھ کو) ملک کےبیشترعلاقوں میں موسم گرم اورشدید حبس برقرار رہنے کا امکان ہے تاہم بالائی پنجاب،خطہ پوٹھوہار، اسلام آباد ،خیبر پختونخوا اورکشمیر میں تیز ہوائوں اور گرج چمک کے ساتھ بارش کا امکان ہے۔

اس دوران شمال مشرقی پنجاب، بالائی خیبر پختونخوا اور کشمیر میں چند مقامات پر تیز موسلادھار بارش کی بھی توقع ہے۔گذشتہ 24 گھنٹوں کے دوران ملک کے بیشتر علاقوں میں موسم گرم اور شدید حبس رہا تاہم کشمیر، اسلام آباد، شمال مشرقی پنجاب اور بالائی خیبر پختونخوامیں چند مقامات پر تیزہوائوں اور گرج چمک کے ساتھ بارش ہوئی۔سب سے زیادہ بارش کشمیر: مظفرآباد (ایئرپورٹ 09، سٹی 06)،خیبر پختونخوا: کاکول 08، مالم جبہ 05، تخت بھائی 03، پٹن 01،پنجاب: اسلام آباد (سیدپور 07)، سیالکوٹ سٹی میں 01 ملی میٹر بارش ہوئی۔منگل کوریکارڈ کئے گئے زیادہ سےزیادہ درجہ حرارت : دالبندین 45،نوکنڈی 44، دادو اور چلاس میں 43 سینٹی گریڈ ریکارڈ کیا گیا۔