پنجاب ہائی وے پٹرول نے جولائی 2025کی کارکردگی رپورٹ جاری کردی

منگل 5 اگست 2025 22:20

لاہور (اُردو پوائنٹ اخبارتازہ ترین - اے پی پی۔ 05 اگست2025ء) پنجاب ہائی وے پٹرول (پی ایچ پی) صوبہ بھر میں شاہرات پر شہریوں کی خدمت و تحفظ اور قوانین کی پاسداری کیلئے سرگرم عمل ہے جس کے تسلسل میں پی ایچ پی نے ماہِ جولائی 2025کی کارکردگی رپورٹ جاری کردی ہے۔ترجمان پنجاب پولیس نے تفصیلات بتاتے ہوئے کہا کہ ماہ جولائی میں پی ایچ پی نے شاہرات پر بذریعہ ای پولیس پوسٹ ایپ 4.1ملین افراد کو چیک کیا۔

دوران چیکنگ 428اشتہاری مجرمان اور عدالتی مفروران کو گرفتار کیا گیا۔ پنجاب بھر کی شاہرات پر 1.9ملین گاڑیوں کو چیک کیا گیا اور 310چوری شدہ گاڑیاں /موٹر سائیکلیں برآمد کی گئیں۔ ایکسل لوڈ کی خلاف ورزی پر 39ہزار 5سو 37اوور لوڈڈ گاڑیوں کے خلاف قانونی کارروائی کی گئی۔ گیس سلنڈر کے غیر قانونی استعمال پر 869گاڑیوں کے خلاف کارروائی کی گئی۔

(جاری ہے)

شہریوں کی سہولت کے پیشِ نظر 23ہزار 7سو 13ڈرائیونگ لائسنس جاری کیے گئے۔

66گمشدہ بچوں کو ان کے والدین سے ملوایا گیا اور 3741 عارضی و مستقل تجاوزات کو ختم کر کے ٹریفک کے بہا وکو بہتر بنایا گیا۔15477مسافروں کو شاہرات پر مختلف نوعیت کی مدد و رہنمائی فراہم کی گئی۔پولیس خدمت مراکز پر 26126شہریوں کو مختلف پولیسنگ خدمات فراہم کی گئیں۔ ناجائز اسلحہ کے استعمال پر 37مقدمات درج کئے گئے،ملزمان کے قبضہ سے 5کلاشنکوف، 5رائفلز، 27پسٹلز اور سینکڑوں گولیاں برآمد کی گئیں۔

منشیات فروشوں سے 1066لیٹر شراب، 2340گرام چرس،ہیروئن 20گرام اور 80گرام آئس برآمد کی گئی۔آئی جی نے بہترین کارکردگی پر پی ایچ پی کو شاباش دی ہے۔انہوںنے پولیس افسران کو ہدایت دیتے ہوئے کہا کہ ٹریفک کی روانی اور شہریوں کی خدمت و حفاظت کیلئے بھرپور محنت اور خلوص نیت سے فرائض سر انجام دئیے جائیں۔