Live Updates

ڈپٹی چیئرمین سینیٹ سیدال خان کاسعودی سفارت خانے کا دورہ ،سفیر نواف بن سعید المالکی سے ملاقات

منگل 5 اگست 2025 22:40

اسلام آباد (اُردو پوائنٹ اخبارتازہ ترین - اے پی پی۔ 05 اگست2025ء) ڈپٹی چیئرمین سینیٹ سیدال خان نے منگل کو سعودی سفارت خانے کا دورہ کیا،سعودی عرب کے سفیر نواف بن سعید المالکی سے ملاقات کی اور باہمی دلچسپی کے امور، دو طرفہ تعلقات، خطے کی صورتحال اور باہمی تعاون کو مزید مستحکم بنانے سے متعلق امور پر تفصیلی تبادلہ خیال کیا ۔سینیٹ سیکرٹریٹ سے جاری اعلامیہ کے مطابق ڈپٹی چیئرمین سینیٹ سیدال خان نے کہا کہ سعودی عرب پاکستان کا مخلص اور آزمودہ دوست ہے، جس نے ہر مشکل وقت میں پاکستان کا بھرپور ساتھ دیا۔

خواہ وہ سیلاب جیسی قدرتی آفات ہوں یا زلزلے جیسی آزمائشیں، سعودی عرب ہمیشہ پاکستان کے شانہ بشانہ کھڑا رہا ہے۔ انہوں نے کہا کہ دونوں ممالک کے مابین تعلقات مذہبی ہم آہنگی، ثقافتی قربت، باہمی اعتماد اور اخوت پر استوار ہیں۔

(جاری ہے)

سیدال خان نے کہا کہ سعودی عرب نے پاکستان میں سرمایہ کاری کر کے ملکی معیشت کو سہارا دیا جبکہ لاکھوں پاکستانی سعودی عرب میں روزگار حاصل کر کے وطن عزیز کے لیے قیمتی زرمبادلہ کا ذریعہ بن رہے ہیں۔

انہوں نے سعودی عرب میں مقیم پاکستانیوں کو وطن کا قیمتی اثاثہ قرار دیا۔ڈپٹی چیئرمین سینیٹ نے کہا کہ سعودی عرب دنیا بھر کے مسلمانوں کے لیے روحانی مرکز ہے، جہاں مقدس مقامات مکہ مکرمہ اور مدینہ منورہ موجود ہیں۔ انہوں نے کہا کہ سعودی عرب کی سلامتی اور حرمت کے لیے ہر پاکستانی اپنی جان قربان کرنے کو تیار ہے۔ پاکستان اور سعودی عرب کی دوستی قابلِ فخر ہے اور دونوں ممالک نے بین الاقوامی فورمز پر ہمیشہ ایک دوسرے کے مؤقف کی حمایت کی ہے۔

اس موقع پر سعودی سفیر نواف بن سعید المالکی نے کہا کہ سعودی عرب پاکستان کے ساتھ تعلقات کو انتہائی اہمیت دیتا ہے، اور دونوں ممالک کے درمیان اخوت، اعتماد اور باہمی احترام کا مضبوط رشتہ قائم ہے۔ انہوں نے کہا کہ دونوں برادر اقوام کے عوام کے درمیان مثالی تعلقات موجود ہیں، جو وقت کے ساتھ مزید مضبوط ہو رہے ہیں۔