جنوبی کوریا کا چینی سیاحوں کو ویزا فیس سے مستثنیٰ داخلے کی سہولت دینے کا اعلان

بدھ 6 اگست 2025 16:17

سیئول (اُردو پوائنٹ اخبارتازہ ترین - اے پی پی۔ 06 اگست2025ء) جنوبی کوریا نے اعلان کیا ہے کہ وہ چینی سیاحتی گروپس کو ویزا فیس کے بغیر داخلے کی سہولت دے گا، جو 29 ستمبر 2025 سے جون 2026 تک مؤثر رہے گی۔ رائٹرز کے مطا بق اس اقدام کا مقصد ایشیا پیسفک اقتصادی تعاون (اے پی ای سی ) سربراہی اجلاس سے قبل غیر ملکی سیاحت کو فروغ دینا ہے۔یہ سہولت ابتدائی طور پر مارچ میں اُس وقت اعلان کی گئی تھی، جب چین نے گزشتہ نومبر میں جنوبی کوریائی شہریوں اور دیگر ممالک کے سیاحوں کے لیے ویزا چھوٹ کا اعلان کیا تھا۔

جنوبی کوریا کی سیاحت کی وزارت کے مطابق، یہ اقدام نہ صرف دونوں ممالک کے تعلقات میں بہتری کی امیدوں کے تحت کیا گیا ہے، بلکہ اکتوبر کے اوائل میں چین کے قومی تعطیلاتی ہفتے کے دوران سیاحوں کی آمد کو فروغ دینے کے لیے بھی اہم ثابت ہوگا۔

(جاری ہے)

حکام کا کہنا ہے کہ اس فیصلے سے غیر ملکی سیاحت کی بحالی کے ساتھ ملکی معیشت کو بھی تقویت ملے گی۔یہ فیصلہ ایسے وقت میں کیا گیا ہے جب نئی لبرل حکومت، صدر لی جے میونگ کی قیادت میں، چین کے ساتھ بہتر تعلقات کی امید رکھتی ہے۔

واضح رہے کہ جنوبی کوریا 31 اکتوبر سے 1 نومبر 2025 کے دوران جنوب مشرقی شہر گیونگجو میں ایشیا پیسفک اقتصادی تعاون (اے پی ای سی ) اجلاس کی میزبانی کرے گا، جہاں چینی صدر شی جن پنگ اور امریکی صدر ڈونلڈ ٹرمپ کے درمیان علیحدہ ملاقات کا امکان بھی ظاہر کیا جا رہا ہے۔