حزب اللہ کے اپنے ہتھیار نہ ڈالنے کے موقف کی حمایت کرتے ہیں ،ایران

لبنانی تنظیم حزب اللہ کو غیر مسلح کرنے کا منصوبہ ناکام ہو جائے گا،ایرانی وزیرخارجہ

جمعرات 7 اگست 2025 16:38

تہران (اُردو پوائنٹ اخبارتازہ ترین - این این آئی۔ 07 اگست2025ء)ایرانی وزیر خارجہ عباس عراقچی نے کہا ہے کہ لبنان تنظیم حزب اللہ کو غیر مسلح کرنے کا منصوبہ ناکام ہو جائے گا۔ انھوں نے مزید کہا کہ ہم حزب اللہ کے اپنے ہتھیار نہ ڈالنے کے موقف کی حمایت کرتے ہیں۔ سرکاری ٹی وی سے گفتگو کرتے ہوئے عراقچی نے کہا تہران حزب اللہ کی حمایت کرتا ہے لیکن کسی بھی مداخلت کے بغیر۔

(جاری ہے)

انہوں نے مزید کہا حزب اللہ کو غیر مسلح کرنے کی کوشش کوئی نیا معاملہ نہیں ہے، ماضی میں بھی ایسی کوششیں ہو چکی ہیں اور ان کی وجوہات سب پر عیاں ہیں، کیونکہ میدانِ جنگ میں مزاحمتی ہتھیاروں کی افادیت ثابت ہو چکی ہے۔عباس عراقچی نے مزید کہا حزب اللہ کے سیکریٹری جنرل کی پر عزم قیادت اور شدید لہجے میں جاری کردہ بیان سے ظاہر ہوتا ہے کہ یہ جماعت دبا کے سامنے جھکنے والی نہیں۔ایرانی وزیر نے یہ بھی واضح کیا کہ حزب اللہ کی صفوں کو ازسرِنو منظم کیا جا چکا ہے اور یہ گروہ اپنی حفاظت کے لیے درکار تمام صلاحیت رکھتا ہے۔عراقچی نے کہا آئندہ اقدامات کا حتمی فیصلہ حزب اللہ خود کرے گی اور ایران بطور حامی قوت، اس کا ساتھ دے گا لیکن اس کے فیصلوں میں مداخلت نہیں کرے گا۔