خیبر میڈیکل یونیورسٹی اور پالمیڈ اکیڈمی کے درمیان مفاہمت کی یادداشت پر دستخط ہو گئے

پشاور (اُردو پوائنٹ اخبارتازہ ترین - اے پی پی۔ 08 اگست2025ء) خیبر میڈیکل یونیورسٹی (کے ایم یو)پشاور اورفلسطین میڈیکل اکیڈمی ( پالمیڈ اکیڈمی) بولٹن، برطانیہ کے درمیان مفاہمت کی یادداشت پر دستخط ہو گئے، جس کا مقصد فلسطینی طلباکو خیبر میڈیکل یونیورسٹی کے مختلف تعلیمی وتحقیقی شعبوں صحت میں سائنسی و تکنیکی تعاون فراہم کرنا ہے۔ اس معاہدے کے تحت خیبر میڈیکل یونیورسٹی فلسطین سے تعلق رکھنے والے ہیلتھ کیئر پروفیشنلز، بشمول انڈرگریجویٹ اور پوسٹ گریجویٹ میڈیکل طلبا، پیرا میڈکس، نرسز اور دیگر شعبہ صحت کے ماہرین کے لیے تدریسی سہولیات فراہم کرے گی۔

مفاہمتی یادداشت پر خیبر میڈیکل یونیورسٹی کی جانب سے وائس چانسلر پروفیسر ڈاکٹر ضیاء الحق اور پالمیڈ اکیڈمی کی جانب سے پروفیسر ڈاکٹر محمود لوبانی نے دستخط کئے۔

(جاری ہے)

اس موقع پر صوبائی وزیر برائے اعلیٰ تعلیم مینا خان آفریدی بھی موجود تھے ۔ معاہدے میں اس بات پر بھی اتفاق کیا گیا کہ دونوں ادارے باہمی دلچسپی کے شعبوں میں علم، مہارت اور تعلیمی تجربات کے تبادلے کے لیے مل کر کام کریں گے۔

اس شراکت میں مشترکہ ہیلتھ کیئر ٹریننگ پروگرامز، کانفرنسز، سیمینارز، سمپوزیمز، ورکشاپس اور قومی و بین الاقوامی صحت کے موضوعات پر لیکچرز کا انعقاد بھی شامل ہے۔ مزید برآں منتخب شعبوں میں مشترکہ تحقیقی منصوبے اور ریسرچ طلبا کی نگرانی بھی اس معاہدے کا حصہ ہیں۔ دونوں فریقین نے اس امر کا عزم ظاہر کیا ہے کہ تمام مشترکہ سرگرمیاں قومی و بین الاقوامی اخلاقی معیارات اور ریگولیٹری فریم ورکس کے مطابق انجام دی جائیں گی۔

یہ معاہدہ موثر تاریخ سے پانچ سال تک نافذ العمل رہے گا، تاہم کسی بھی فریق کی جانب سے چھ ماہ کا تحریری نوٹس دے کر اسے قبل از وقت ختم کیا جا سکے گا۔دریں اثناء مفاہمتی یادداشت پر آن لائن دستخطوں کی تقریب سے بطور مہمان خصوصی خطاب کرتے ہوئے صوبائی وزیر برائے اعلیٰ تعلیم مینا خان آفریدی نے کہا کہ یہ حکمتِ عملی پر مبنی شراکت صحت کی تعلیم، تربیت اور تحقیق میں عالمی تعاون کو فروغ دینے کی جانب ایک اہم قدم ہے، جو طبی سائنس کی ترقی اور صحت کی فراہمی کے نظام کو بہتر بنانے میں معاون ثابت ہوگی۔

انہوں نے کہا کہ ہمارے دل اہل فلسطین بالخصوص غزہ کے مظلوم اور مجبور مسلمانوں کے ساتھ دھڑکتے ہیں ۔انہوں نے کہ مصیبت کی اس گھڑی میں اہل غزہ کا ہر طرح سے ساتھ دینا انسانیت اور ہمارے ایمان کا تقاضہ ہے۔مینا خان آفریدی نے کے ایم یو کی جانب سے فلسطینی طلباء کو صحت کے مختلف شعبوں میں تعلیم وتحقیق کے مواقع فراہم کرنے کے عزم اور عملی اقدامات کی تعریف کرتے ہوئے کہا کہ اس ضمن میں صوبائی حکومت کی جانب سے ہرممکن تعاون فراہم کیاجائے گا۔

انہوں نے کہا کہ وزیر اعلیٰ خیبر پختونخوا علی امین خان گنڈاپور کی قیادت میں اپنے فلسطینی بھائیوں کے شانہ بشانہ کھڑی ہے اور صوبائی حکومت نہ صرف غزہ میں ڈھائے جانے والے اسرائیلی ظلم وبربریت کی مذمت کرتی ہے بلکہ خیبرپختونخوا میں فلسطینی طلباکو تمام ممکنہ سہولیات بھی فراہم کرنے کے لئے پرعزم ہے۔