ژوب میں پاک افغان بارڈر سے دراندازی کی کوشش ناکام، 33 خوارج ہلاک

7 اور 8 اگست 2025ء کی درمیانی رات خوارج کے ایک بڑے گروہ کی نقل و حرکت نوٹ کی گئی؛ آئی ایس پی آر

ساجد علی جمعہ 8 اگست 2025 17:31

ژوب میں پاک افغان بارڈر سے دراندازی کی کوشش ناکام، 33 خوارج ہلاک

راولپنڈی ( اُردو پوائنٹ اخبارتازہ ترین۔ 08 اگست 2025ء ) پاک افغان سرحد سے فتنہ الہندوستان کے خوارجیوں کی دراندازی کی کوشش ناکام بناتے ہوئے سیکیورٹی فورسز نے 33 خوارج کو ہلاک کردیا۔ مسلح افواج کے شعبہ تعلقات عامہ ( آئی ایس پی آر ) کے مطابق 7 اور 8 اگست 2025ء کی درمیانی رات خوارج کے ایک بڑے گروہ کی نقل و حرکت نوٹ کی گئی، جس کا تعلق بھارتی پراکسی فتنہ الخوارج سے تھا، جنہون نے پاکستان و افغان سرحد پر دراندازی کی کوشش کی جس کا سیکورٹی فورسز نے بلوچستان کے ضلع ژوب کے علاقے سمبازہ میں پتہ لگایا۔

(جاری ہے)

آئی ایس پی ار کا کہنا ہے کہ ہمارے فوجیوں نے مؤثر طریقے سے دراندازی کی ان کی کوشش کو ناکام بنایا، سکیورٹی فورسز کی جرات مندانہ کارروائی اور ہنر مندی کے نتیجے میں 33 ہندوستانی سپانسر شدہ خوارج کو جہنم واصل کر دیا گیا، جن سے اسلحہ، گولہ بارود اور دھماکہ خیز مواد کا بڑا ذخیرہ بھی برآمد کیا گیا، علاقے میں پائے جانے والے دیگر خوارج کو ختم کرنے کے لیے آپریشن کیا جا رہا ہے، پاکستان کی سکیورٹی فورسز ملک کی سرحدوں کے دفاع اور ملک سے ہندوستانی سپانسرڈ دہشت گردی کی لعنت کو ختم کرنے کے اپنے عزم میں پرعزم اور غیر متزلزل ہیں۔