پاکستان کی ڈیجیٹائزیشن کی سمت میں اٹھائے گئے اقدامات معیشت کی ترقی اور ملک کو عالمی سطح پر جدید تقاضوں سے ہم آہنگ کرنے میں اہم کردار ادا کر رہے ہیں، شہبازشریف

جمعہ 8 اگست 2025 22:08

اسلام آباد (اُردو پوائنٹ اخبارتازہ ترین - آن لائن۔ 08 اگست2025ء) وزیرِ اعظم محمد شہباز شریف نے وزارت انفارمیشن ٹیکنالوجی کی جانب سے گزشتہ برس کے 3.8 ارب ڈالر کے آئی ٹی برآمدات کے ہدف کو کامیابی سے عبور کرنے پر خوشی کا اظہار کرتے ہوئے آئندہ برسوں میں 30 ارب ڈالر کے ہدف کو حاصل کرنے کے لیے جامع لائحہ عمل تشکیل دینے کی ہدایت کی ہے۔وزیرِ اعظم کی زیر صدارت اسلام آباد میں منعقدہ اجلاس میں وزارت انفارمیشن ٹیکنالوجی کے کامیاب اقدامات پر بریفنگ دی گئی، جس میں فری لانسرز کی تعداد میں نمایاں اضافہ، نئے اسٹارٹ-اًپس کو عالمی سطح پر معاونت فراہم کرنے اور 5 لاکھ سے زائد افراد کو 4G تک رسائی دینے جیسے اہم اہداف کا ذکر کیا گیا۔

وزیرِ اعظم نے کہا کہ پاکستان کی ڈیجیٹائزیشن کی سمت میں اٹھائے گئے اقدامات معیشت کی ترقی اور ملک کو عالمی سطح پر جدید تقاضوں سے ہم آہنگ کرنے میں اہم کردار ادا کر رہے ہیں۔

(جاری ہے)

شہباز شریف نے آئی ٹی برآمدات کو 30 ارب ڈالر تک پہنچانے کے لیے پورے ڈیجیٹل ایکو سسٹم اور انفراسٹرکچر کی تشکیل کی ضرورت پر زور دیا۔ انہوں نے کہا کہ وزارت انفارمیشن ٹیکنالوجی اور این آئی ٹی بی کی ازسر نو تنظیم اور جدید نظام کی تشکیل، نوجوانوں اور خواتین کو آئی ٹی کے شعبے میں روزگار کے بہتر مواقع فراہم کرنے کی غرض سے اقدامات اٹھائے جا رہے ہیں۔

وزیرِ اعظم نے اس عزم کا اظہار کیا کہ آئی ٹی کے شعبے کی ترقی کے لیے تیز رفتاری سے اقدامات کیے جائیں گے تاکہ پاکستان کی معیشت کو عالمی سطح پر ایک نئی سمت دی جا سکے۔