لیسکو ٹیم کی برج اٹاری سب ڈویژن میں کارروائی ، 26افراد بجلی چوری کرتے پکڑے گئے

جمعہ 8 اگست 2025 23:00

لاہور (اُردو پوائنٹ اخبارتازہ ترین - اے پی پی۔ 08 اگست2025ء) چیف ایگزیکٹو لیسکو کی زیرو ٹالرنس پالیسی کے تحت لاہور الیکٹرک سپلائی کمپنی (لیسکو) کی اینٹی تھیفٹ ٹیم کی کارروائیاں جاری ہیں،ترجمان کے مطابقSE ناردرن سرکل وسیم اقبال کی زیرِ نگرانی کوٹ عبد المالک ڈویژن کی برج اٹاری سب ڈویژن کی حدود میں رینجرز کی معاونت سے بڑی کارروائی کی گئی، جہاں 26 افراد کو لیسکو کی مین لائن سے براہِ راست بجلی چوری کرتے ہوئے پکڑا گیا۔

جنا ح گارڈن سوسائٹی جو لیسکو(واپڈا) سے منظور شدہ نہیں ہے وہاں بااثر الیکٹریشن آفاق احمدجو کہ نا صرف خود بھی بجلی چوری میں ملوث پایاگیا بلکہ سو سائٹی کے متعددگھروں کو بھی بجلی چوری میں معاونت فراہم کر رہا تھا۔ لیسکو ٹیم نے موقع سے 6 بجلی چوروں کو موقع پر گرفتار کر لیا، جبکہ دیگر20 افراد کے خلاف بھی کارروائی کے لیے متعلقہ تھانے میں ایف آئی آرز کے لیے درخواستیں جمع کروا دی گئی ہیں،یہ کاروائیاں ڈسکوز سپورٹ یونٹ پولیس اور رینجرز کی معاونت سے جاری ہیں۔

(جاری ہے)

چیف ایگزیکٹو لیسکو کا کہنا ہے کہ کسی قسم کی سیاسی، ذاتی یا علاقائی رعایت کے بغیر قانون کی عملداری کو یقینی بنا رہے ہیں، بجلی چوروں کے خلاف کارروائیاں روزانہ کی بنیاد پر جاری رہیں گی تاکہ کمپنی کا مالی تحفظ اور صارفین کا اعتماد بحال رکھا جا سکے۔ترجمان لیسکو کے مطابق عوام سے اپیل ہے کہ بجلی چوری یا مشکوک سرگرمی کی اطلاع لیسکو ہیلپ لائن 118، لیسکو ویب سائٹ یا قریبی دفتر میں فوری طور پر دیں تاکہ بروقت قانونی کارروائی ممکن بنائی جا سکے۔