ناروے کپ جیتنے والے قومی ہیروز کا سندھ اسمبلی میں شاندار استقبال

وزیر شرجیل میمن نے وزیراعلیٰ سندھ اور اسپورٹس ڈپارٹمنٹ کی جانب سے ان کھلاڑیوں کو انعامات دینے کی یقین دہانی کرائی

ہفتہ 9 اگست 2025 13:19

ناروے کپ جیتنے والے قومی ہیروز کا سندھ اسمبلی میں شاندار استقبال

کراچی(اُردو پوائنٹ اخبارتازہ ترین - این این آئی۔ 09 اگست2025ء) ناروے کپ جیت کر ملک و قوم کا نام روشن کرنے والی پاکستانی ٹیم پارلیمانی سیکرٹری و ایم پی اے لیاری شازیہ کریم سنگھار کے ہمراہ سندھ اسمبلی پہنچی جہاں کھلاڑیوں کا شاندار استقبال کیا گیا۔اسپیکر سندھ اسمبلی اویس قادر شاہ، سینیئر وزیر شرجیل انعام میمن، سابق اسپیکر آغا سراج درانی اور اپوزیشن رہنما صابر راجپوت نے فلور آف دی ہاؤس پر کھڑے ہو کر ٹیم کو شاندار الفاظ میں خوش آمدید کہا۔

ارکان اسمبلی نے ان نوجوان کھلاڑیوں کو "قومی ہیروز" قرار دیتے ہوئے کہا کہ انہوں نے پاکستان اور سندھ کا وقار بلند کیا ہے۔سینیئر وزیر شرجیل میمن نے وزیراعلیٰ سندھ اور اسپورٹس ڈپارٹمنٹ کی جانب سے ان کھلاڑیوں کو انعامات دینے کی یقین دہانی کرائی اور کہا کہ ان کے شایانِ شان انعامات کا باضابطہ اعلان جلد کیا جائے گا۔

(جاری ہے)

اس موقع پر دلچسپ صورتحال اس وقت پیدا ہوئی جب آغا سراج درانی نے ٹرانسپورٹ منسٹر شرجیل میمن کو تجویز دی کہ بچوں کو ریڈ بس کا تحفہ بھی دیا جائے تاکہ انہیں انٹر سٹی میچز میں آمدورفت کی سہولت میسر ہو۔

اس تجویز پر اسمبلی ارکان نے ڈیسک بجا کر بھرپور تائید aکی، جس سے ناروے کپ کے فاتح کھلاڑیوں میں خوشی کی لہر دوڑ گئی۔واضح رہے کہ گزشتہ دنوں پاکستانی ٹیم بیٹر فیوچر پاکستان نے ناروے کپ میں انڈر 15 کا ٹائٹل جیتا تھا۔فائنل میں اس نے ناروے کے کلب یووک لین کو 0-2 سے شکست دی۔ "بیٹر فیوچر پاکستان" کے نام سے میدان میں اٴْترنے والی لیاری کے باصلاحیت نوجوانوں کی اس جیت نے نہ صرف کھیل کے میدان میں تاریخ رقم کی بلکہ پاکستان کا نام عالمی افق پر فخر سے بلند کیا تھا۔