لاہور میں موسلادھار بارش، جل تھل ایک، لیسکو فیڈرز ٹرپ، بجلی معطل

موسلادھار بارش کے دوران نشیبی علاقے زیرآب ،ٹرانسفارمر جلنے کی شکایات میں اضافہ

ہفتہ 9 اگست 2025 16:48

لاہور (اُردو پوائنٹ اخبارتازہ ترین - این این آئی۔ 09 اگست2025ء) مون سون چھٹے سپیل کی زوردار انٹری، لاہور میں ایک گھنٹہ سے زائد تک موسلا دھار بارش سے جل تھل ایک ہوگیا، لیسکو کا ترسیلی نظام متاثر، متعدد علاقوں میں بجلی کی سپلائی معطل ہوگئی جبکہ موسلادھار بارش کے دوران نشیبی علاقے زیرآب آگئے۔ رپورٹ کے مطابق دوپہر 1:35سے دوپہر 2:35تک پانی والا تالاب میں 65ملی میٹر بارش ریکارڈ کی گئی۔

گلبرگ 5، لکشمی چوک میں 58ملی میٹر بارش ریکارڈ کی گئی۔نشتر ٹائون میں 8،چوک ناخدا 39 اور فرخ آباد میں 26ملی میٹر بارش ریکارڈ کی گئی۔ گلشن راوی میں 10، اقبال ٹائون 12،سمن آباد 7،جوہر ٹائون 9اور قرطبہ چوک میں 1ملی میٹر بارش ریکارڈ ہوئی۔ شملہ پہاڑی، لکشمی چوک ،مال روڈ، جیل روڈ پر موسلادھار بارش برسی،لکشمی چوک ،ڈیوس روڈ، ایمپریس روڈ، حاجی کیمپ پر بارشی پانی جمع ہوگیا۔

(جاری ہے)

دوسری جانب شہر کے مختلف علاقوں میں موسلا دھار بارش کے باعث بجلی کا ترسیلی نظام بری طرح متاثر ہو گیا،بارش سے لیسکو کے 120سے زائد فیڈرز ٹرپ کر گئے، فیڈرز ٹرپ ہونے اور دیگر تکنیکی خرابیوں کے باعث متعدد علاقوں میں بجلی بند ہوگئی۔ گلشن راوی، سمن آباد، قلعہ گجر سنگھ، شاہدرہ ،امامیہ کالونی، شالیمار ،باغبانپورہ ،ہربنس پورہ، گڑھی شاہو ،مغل پورہ ،بھاٹی گیٹ سمیت اندرون شہر کے مختلف علاقوں میں بجلی بند رہی۔بارشوں میں ٹرانسفارمر جلنے کی شکایات میں اضافہ ہوگیا، ٹرانسفارمر جلنے سے مختلف علاقوں میں گھنٹوں بجلی بند رہنا معمول بن گیا، بجلی کی طویل بندش سے شہری پریشان ہیں۔