ڈی جی رینجرز سندھ کا سائٹ ایسوسی ایشن آف انڈسٹری کا دورہ

انڈسٹریل ایریاز میں بالخصوص سیکیورٹی موثر بنانا اولین ترجیح ہے،میجرجنرل محمد شمریز

ہفتہ 9 اگست 2025 17:16

کراچی (اُردو پوائنٹ اخبارتازہ ترین - این این آئی۔ 09 اگست2025ء)ڈی جی رینجرز سندھ میجر جنرل محمد شمریز نے سائٹ ایسوسی ایشن آف انڈسٹری کا دورہ کیا ہے، اس موقع پر انہوں نے کہا کہ کراچی میں بالعموم اور انڈسٹریل ایریاز میں بالخصوص سیکیورٹی موثر بنانا رینجرز کی اولین ترجیح ہے۔تفصیلات کے مطابق ڈی جی رینجرز سندھ نے سائٹ ایسوسی ایشن آف انڈسٹری کے ممبران سے ملاقات کی ہے، دفتر پہنچنے پر ایسوسی ایشن کے عہدیداران اور ممبران نے ڈی جی رینجرز سندھ کا استقبال کیا۔

ایسوسی ایشن کے ممبران نے بنیان المرصوص (معرکہ حق)میں شان دار فتح پر تمام دفاعی اداروں کو مبارک باد پیش کی، اور شہر قائد میں پائیدار امن کے قیام میں قانون نافذ کرنے والے اداروں کی کاوشوں کو سراہا، بالخصوص رینجرز کے کردار اور شہدا کی قربانیوں کو خراج تحسین پیش کیا گیا۔

(جاری ہے)

ڈی جی رینجرز سندھ میجر جنرل محمد شمریز نے اس موقع پر کہا کہ کراچی پاکستان کا معاشی حب ہے، اور تاجر برادری کا ملکی ترقی میں کلیدی کردار ہے، کراچی میں بالعموم اور انڈسٹریل ایریاز میں بالخصوص سیکیورٹی موثر بنانا اولین ترجیح ہے۔

ڈی جی رینجرز نے کہا صنعت کاروں اور کاروباری حضرات کو بلاخوف و خطر کاروباری سرگرمیاں جاری رکھنی چاہئیں۔ انھوں نے بزنس کمیونٹی کے مختلف خدشات کو حل کرنے کی ہدایات بھی جاری کیں۔