Live Updates

حکومتی دعووں کے باوجود مہنگائی کم نہ ہو سکی

رواں ہفتے پیاز، ٹماٹر، چکن، دالوں، چائے، دودھ، ڈیزل سمیت متعدد اشیاء مزید مہنگی ہو گئیں

محمد علی ہفتہ 9 اگست 2025 18:26

لاہور (اُردو پوائنٹ اخبارتازہ ترین۔ 09 اگست2025ء) حکومتی دعووں کے باوجود مہنگائی کم نہ ہو سکی، رواں ہفتے پیاز، ٹماٹر، چکن، دالوں، چائے، دودھ، ڈیزل سمیت متعدد اشیاء مزید مہنگی ہو گئیں۔ تفصیلات کے مطابق پاکستان میں گزشتہ ہفتے مہنگائی میں 0.05 فیصد اضافہ ہوگیا۔ ادارہ شماریات کا کہنا ہے کہ سالانہ شرح 1.73 فیصد ریکارڈ کی گئی۔وفاقی ادارہ شماریات کے مطابق رواں ہفتے مہنگائی میں 0.05 فیصد اضافہ ہوا، مہنگائی کی سالانہ شرح 1.73 فیصد ریکارڈ کی گئی۔

وفاقی ادارہ شماریات کی جانب سے جاری کردہ مہنگائی کے ہفتہ وار اعداد و شمار کے مطابق رواں ہفتے 12 اشیائے ضروریہ کی قیمتوں میں اضافہ ہوا، اس دوران 12 اشیا کی قیمتوں میں کمی اور 27 کے دام مستحکم رہے۔ایف بی ایس کے مطابق پیاز 16.53 فیصد، ٹماٹر 10.17، چکن 4.12 فیصد مہنگا ہوا، انڈے، دال مسور، چائے، تازہ دودھ، ڈیزل، سگریٹس، لکڑی بھی مہنگی ہوگئیں۔

(جاری ہے)

رپورٹ کے مطابق گزشتہ ہفتے کیلے، دال مونگ، ماش، آلو، چینی کے دام کم ہوئے، لہسن، چاول، گندم کا آٹا، ایل پی جی اور پیٹرول کی قیمتوں میں بھی کمی ہوئی۔رپورٹ میں بتایا گیا ہے کہ مختلف شہروں میں چینی کی قیمت میں معمولی کمی ریکارڈ کی گئی، ملک میں گزشتہ ہفتے چینی کی اوسط قیمت میں 66 پیسے فی کلو کمی ہوئی، چینی کی اوسط قیمت 179.33 سے کم ہو کر 178.67 روپے کلو ہوگئی۔

رپورٹ کے مطابق ملک کے مختلف شہروں میں چینی 172 سے 190 روپے فی کلو فروخت ہوئی، پشاور میں چینی سب سے زیادہ مہنگی، 190 روپے کلو تک فروخت ہوئی، گوجرانوالہ، سیالکوٹ 185، کوئٹہ 182، بنوں، فیصل آباد 180 روپے ریٹ رہے۔رپورٹ میں بتایا گیا ہے کہ حیدرآباد اور ملتان میں چینی کی قیمت 180، سکھر میں قیمت 175 روپے کلو ریکارڈ کی گئی، راولپنڈی، اسلام آباد اور لاہور میں چینی 173 روپے کلو تک فروخت ہورہی ہے۔