خدمت خلق مقدس جذبے کیساتھ عظیم عبادت بھی ہے،احمد حسن رانجھا

نوجوان نسل کو مثبت سرگرمیاں فراہم کرنا معاشرے کو برائی سے پاک کرنیکا بنیادی اقدام ہے جشن آزادی کی تقریبات میں شجرکاری، خواتین کرکٹ، اے ایف ایل اور بیس بال میچز کرائینگے،ڈی جی پی ایچ اے و چیئرمین یس کا تنظیم کی سالگرہ تقریب سے خطاب

اتوار 10 اگست 2025 17:20

راولپنڈی(اُردو پوائنٹ اخبارتازہ ترین - این این آئی۔ 10 اگست2025ء)خدمت خلق مقدس جذبے کیساتھ عظیم عبادت بھی ہے، نوجوان نسل کو کھیلوں جیسی مثبت سرگرمیاں فراہم کرنا معاشرے کو برائیوں سے پاک کرنے کا بنیادی اقدام ہے،یوتھ ایجوکیشن اینڈ سپورٹس (YES) ویلفیئر سوسائٹی (رجسٹرڈ) راولپنڈی7 برس سے پاکستان میں کھیلوں کے فروغ، خصوصاً بچیوں کو محفوظ اور باعزت طریقے سے کھیلوں کی سہولیات فراہم کرنے کیلئے سرگرم ہے۔

ان خیالات کا اظہار ڈائریکٹر جنرل پی ایچ اے و چیئرمین یس احمد حسن رانجھا نے یوتھ ایجوکیشن اینڈ سپورٹس ویلفیئر سوسائٹی کی ساتویں سالگرہ کا کیک کاٹنے کی تقریب سے خطاب کرتے ہوئے کیا۔ اس موقع پر فلاحی تنظیم کے صدر ڈاکٹر زاہداعوان، نائب صدر سابق ٹیسٹ کرکٹر نوید قریشی و دیگر مہمان بھی موجود تھے۔

(جاری ہے)

احمد حسن رانجھا نے بتایا کہ یوتھ ایجوکیشن اینڈ سپورٹس ویلفیئر سوسائٹی نے وطن عزیز کا 78واں جشن آزادی، معرکہ حق کا جشن فتح اور یوم دفاع شایان شان طریقے سے منانے کیلئے پارکس اینڈ ہارٹیکلچر اتھارٹی (پی ایچ ای) راولپنڈی اور ڈسٹرکٹ سپورٹس ڈیپارٹمنٹ راولپنڈی کیساتھ مل کر متعدد پروگرام ترتیب دئیے ہیں جن میں 14 اگست کو شجرکاری، 22 سے 24 اگست تک ویمن ٹی ٹین کرکٹ لیگ اور 6 ستمبر کو آسٹریلین فٹ بال (اے ایف ایل) اور بیس بال کے خواتین میچز نمایاں ہیں۔

اِحمد حسن رانجھا نے کہا کہ نوجوان نسل کو کھیلوں کی جدید سہولیات اور عالمی معیار کی ٹریننگ مہیا کرنے کیلئے راولپنڈی میں مختلف کھیلوں کی اکیڈمیوں کا جال بچھایا جائے گا تاکہ ہر بچے کو اس کی رہائش کے قریب کھیلوں کی سہولیات میسر ہوں اور وہ منفی سرگرمیوں سے دور رہ سکے۔