پنجاب فوڈ اتھارٹی کی کارروائیاں ، قوانین کی خلاف ورزی پر معروف بسکٹ فیکٹری اور سٹور بند

پیر 11 اگست 2025 11:00

لاہور (اُردو پوائنٹ اخبارتازہ ترین - اے پی پی۔ 11 اگست2025ء) پنجاب فوڈ اتھارٹی کی ٹیموں نے لاہور اور مضافات میں کارروائیوں کے دوران ملتان روڈ اور شیخوپورہ روڈ پر 11فوڈ فیکٹریوں اور یونٹس کی چیکنگ کی اور معروف بسکٹ فیکٹری اور سٹور کو بند کر کے 5 یونٹس پر 7لاکھ 65 ہزار روپے جرمانہ عائد کیا۔ڈی جی پنجاب فوڈ اتھارٹی عاصم جاوید کے مطابق قوانین کی خلاف ورزی پر شیخوپورہ روڈ پر واقع معروف بسکٹ فیکٹری اور ملتان روڈ پر فوڈ سٹور کو بند کر دیا گیا۔

فوڈ سٹوریج کو 40 ہزار لیٹر زائد المیعاد آئل برآمد ہونے جبکہ معروف بسکٹ فیکٹری کو بسکٹ کی تیاری میں زائد المیعاد خام مال استعمال کرنے پر بند کیا گیا ۔ انہوں نے کہا کہ فیکٹری میں صفائی کے ناقص انتظامات پائے گئے، ورکرز کا میڈیکل اور ٹریننگ سمیت دیگر لازم ریکارڈ عدم موجود پایا گیا، پروسیسنگ ایریا میں بدبودار ماحول اور اشیا کھلی پائی گئیں۔

(جاری ہے)

50ہزار لیٹر زائد المیعاد تیل،14 ہزار کلو خام مال، 900 کلو پاوڈر، 250 زائد المیعاد گم اور ممنوعہ اشیا تلف کی گئیں۔ انہوں نے کہا کہ ملاوٹ مافیا کے خاتمے کے لئے تمام وسائل بروئے کار لائے جائیں گے،فوڈ بزنس آپریٹرز مقرر کردہ قوانین پر عملدرآمد یقینی بنائیں، خلاف ورزی پر کوئی رعایت نہیں ہے۔ڈی جی پنجاب فوڈ اتھارٹی نےمزید کہا ہے شہری خوراک سے متعلق کسی بھی قسم کی شکایات 1223 پر درج کروا سکتے ہیں۔