افغانستان نے پاکستان سے برآمد شدہ ’بیماری سے متاثرہ‘ 15 ٹن لیموں واپس بھیج دیے

اس سے قبل بھی کئی بار طورخم پر اس طرح کا غیر معیاری سامان پاکستان کو واپس کیا جا چکا ہے، رپورٹ میں دعویٰ

پیر 11 اگست 2025 15:18

افغانستان نے پاکستان سے برآمد شدہ ’بیماری سے متاثرہ‘ 15 ٹن لیموں واپس ..

کابل (اُردو پوائنٹ اخبارتازہ ترین - این این آئی۔ 11 اگست2025ء)افغانستان نے پاکستان سے درآمد کیے گئے 15 ٹن لیموں ’’کینکر بیماری سے متاثرہ اور ناقابل استعمال‘‘ ہونے کی وجہ سے واپس بھیج دیے ہیں۔افغان میڈیا کے مطابق، صوبائی ڈائریکٹر زراعت مولوی ولی محسن نے تاجروں کو ہدایت کی ہے کہ ’اسلامی امارت کے ضوابط کے تحت صرف معیاری اور صحت مند پھل و سبزیاں ہی درآمد کی جائیں تاکہ صارفین اور مارکیٹ دونوں کو نقصان سے بچایا جا سکے‘۔

ماہرین کے مطابق کینکر ایک خطرناک بیماری ہے جو لکڑی دار پودوں خصوصاً ترشاوہ پھلوں (سٹرس فروٹس) کو متاثر کرتی ہے۔ یہ بیماری پھلوں کی نشوونما کے لیے انتہائی نقصان دہ ہے اور کئی تجارتی اقسام، خصوصاً کینو اور لیموں اس کا سب سے زیادہ شکار ہوتی ہیں۔

(جاری ہے)

شدید انفیکشن کی صورت میں پتے جھڑ جاتے ہیں، ٹہنیاں سوکھ جاتی ہیں اور پھل قبل از وقت گر جاتے ہیں، جبکہ متاثرہ پھل اپنی مارکیٹ ویلیو کھو دیتے ہیں یا بالکل ناقابل فروخت ہو جاتے ہیں۔

یہ بیماری ’’زینتھومونس ایگزونوپوڈس پی وی سٹری‘‘ نامی بیکٹیریا سے پیدا ہوتی ہے اور دنیا کے کئی ترشاوہ پھل پیدا کرنے والے ممالک بشمول پاکستان میں پائی جاتی ہے۔ اس کی شدت مختلف اقسام، اقسامِ نباتات اور موسمی حالات کے لحاظ سے بدلتی رہتی ہے۔رپورٹ کے مطابق، ننگرہار کے محکمہ زراعت، آبپاشی اور لائیو سٹاک کے ایک بیان میں کہا گیا ہے کہ لیموں کیڑوں سے متاثر تھے اور انہیں قرنطینہ انتظامیہ نے واپس پاکستان بھیجا۔رپورٹ میں کہا گیا کہ مذکورہ محکمے کی جانب سے اس سے قبل بھی کئی بار طورخم پر اس طرح کا غیر معیاری سامان پاکستان کو واپس کیا جا چکا ہے۔