زیرآب ثقافتی اثاثے پاکستان کی قومی شناخت کا اہم حصہ ہیں،وفاقی وزیر بحری امور

زیرآب ورثے کی ڈیجیٹل میپنگ کا منصوبہ شروع کیا جائے گا، جنید انور چوہدری کا بیان

پیر 11 اگست 2025 16:33

اسلام آباد (اُردو پوائنٹ اخبارتازہ ترین - این این آئی۔ 11 اگست2025ء)وفاقی وزیر بحری امور جنید انوار چوہدری نے کہا ہے زیرآب ثقافتی اثاثے پاکستان کی قومی شناخت کا اہم حصہ ہیں،زیرآب ورثے کی ڈیجیٹل میپنگ کا منصوبہ شروع کیا جائے گا۔اپنے ایک بیان میں وفاقی وزیر نے کہا کہ یونیسکو کی نمائندہ ڈاکٹر کرسٹینا سے ملاقات میں پاکستان کے زیرآب آثار قدیمہ کے تحفظ کیلئے جامع حکمت عملی مرتب کرنے کا منصوبہ تیار کیا ہے،پاکستان 2001 کا یونیسکو کنونشن توثیق کرنے والا پہلا جنوبی ایشیائی ملک بنے گا۔

اپنے بیان میں انہوں نے مزید کہا یونیسکو کے اشتراک سے بحری ثقافتی ورثے کا تحفظ یقینی بنائیں گے،زیرآب ثقافت کا تحفظ ماحولیاتی تبدیلی کے خلاف عالمی جدوجہد کا حصہ ہے،پاکستان کا سمندری تاریخی ورثہ دنیا کے سامنے اجاگر کریں گے،کراچی کی 70 سالہ پرانی بندرگاہی عمارتوں کو عالمی ثقافتی ورثہ قرار دینے کی بھی تجویز ھے،انہوں نے کہا پاکستان میں عالمی معیار کا میری ٹائم میوزیم قائم کیا جائے گا،آثار قدیمہ کی تلاش کے دوران سمندری ماحولیاتی نظام کی حفاظت کریں گے،یونیسکو کے تعاون سے زیرآب ورثے کی ڈیجیٹل میپنگ کا منصوبہ شروع کیا جائے گا۔

(جاری ہے)