کراچی میں 2011 سے جرائم کی دنیا میں سرگرم 3 کار چور گرفتار

پیر 11 اگست 2025 20:21

کراچی (اُردو پوائنٹ اخبارتازہ ترین - این این آئی۔ 11 اگست2025ء)شہر قائد میں 2011 سے جرائم کی دنیا میں سرگرم 3 کار چور گرفتار کر لیے گئے۔تفصیلات کے مطابق کراچی کے علاقے اورنگی ٹان میں اے وی ایل سی اور کار چور ملزمان کے درمیان فائرنگ کا تبادلہ ہوا، جس میں 2 زخمیوں سمیت 3 ملزمان گرفتار کیے گئے۔

(جاری ہے)

پولیس حکام کا کہنا ہے کہ ملزمان سے 2 پستول، چوری کی گئی کار، گاڑیوں کا لاک توڑنے والا راڈ اور چابیاں برآمد ہوئیں، ملزمان کی شناخت امان اللہ، ندیم اور نادر علی کے نام سے ہوئی ہے۔

پولیس حکام کے مطابق ملزم امان اللہ 2011 سے جرائم کی دنیا میں سرگرم ہے، اور ملزمان کا تعلق شہر کے بڑے منظم کار چور گروہ سے ہے، گرفتار ملزمان کے ساتھی عمران اور زکریا مفرور ہیں جن کی گرفتاری کے لیے چھاپے مارے جا رہے ہیں۔ملزمان بلوچستان کی تحصیل جھٹ پٹ کے رہائشی حاجی کو چوری کی گاڑیاں فروخت کرتے تھے، پولیس حکام کا کہنا ہے کہ گرفتار ملزمان کے خلاف تھانہ اقبال مارکیٹ میں مقدمات درج کیے جا رہے ہیں۔