کراچی، لیاری میں ڈاکٹر لعل قتل کیس کا مقدمہ درج، رقم کے تنازع پر قتل کیے جانے کا انکشاف

قاتلوں نے ڈاکٹر لعل کو نام لے کر پکارا، جس پر وہ خطرہ بھانپتے ہوئے بھاگنے لگے،عینی شاہدین

منگل 12 اگست 2025 15:56

کراچی(اُردو پوائنٹ اخبارتازہ ترین - این این آئی۔ 12 اگست2025ء)شہر قائد کے علاقے لیاری میں فائرنگ سے جاں بحق ہونے والے ڈاکٹر شمبولعل کے قتل کا مقدمہ نامعلوم افراد کے خلاف درج کر لیا گیا ہے۔پولیس حکام کے مطابق واقعہ ذاتی دشمنی اور مالی تنازع کا شاخسانہ ہو سکتا ہے۔پولیس حکام کے مطابق مقدمہ قتل کی دفعہ کے تحت تین نامعلوم ملزمان کے خلاف درج کیا گیا ہے۔

ابتدائی تفتیش کے مطابق مقتول ڈاکٹرشمبو لعل کا کچھ افراد سے رقم کے لین دین کا تنازع چل رہا تھا، جب کہ انہوں نے کراچی اور بلوچستان میں متعدد مقدمات بھی درج کرائے تھے۔ ابتدائی تحقیقات میں یہ بات سامنے آئی کہ مقتول کو تعاقب میں آنے والے ملزمان نے نشانہ بنایا، وہ حسب معمول لیاری ایکسپریس وے کے ٹریک پر واک کے لیے جا رہے تھے، پولیس رپورٹ کے مطابق قاتلوں نے ڈاکٹر شمبو لعل کو نام سے پکارا تو انھوں نے بھاگنے کی کوشش کی، تاہم ملزمان نے عقب سے ڈاکٹر پر فائرنگ کی اور وہ 2 گولیاں لگنے سے دم توڑ گئے۔

(جاری ہے)

ایس ایس پی سٹی عارف عزیز کے مطابق مقتول ڈاکٹر شمبو لعل گارڈن کے رہائشی تھے اور عرصہ دراز سے کلا کوٹ پولیس اسٹیشن کے قریب واقع کلینک چلا رہے تھے۔ پولیس کو جائے واردات سے نائن ایم ایم کی گولیوں کے 3 خول ملے ہیں۔واقعے کے عینی شاہدین کے مطابق قاتلوں نے ڈاکٹر لعل کو نام لے کر پکارا، جس پر وہ خطرہ بھانپتے ہوئے بھاگنے لگے۔تاہم ملزمان نے پیچھے سے ان پر اندھا دھند فائرنگ کر دی، جس کے نتیجے میں وہ دو گولیاں لگنے سے موقع پر ہی دم توڑ گئے۔