خیبر پختونخوا پولیس بے پناہ صلاحیتوں سے مالا مال پولیس فورس ہے، اے آئی جی آپریشنز محمد علی بابا خیل کا تقریب سے خطاب

پشاور (اُردو پوائنٹ اخبارتازہ ترین - اے پی پی۔ 12 اگست2025ء) ایڈیشنل انسپکٹر جنرل (اے آئی جی) آف پولیس آپریشنز خیبر پختونخوا محمد علی بابا خیل نے کہا ہے کہ خیبر پختونخوا پولیس بے پناہ صلاحیتوں سے مالا مال پولیس فورس ہے، ان کے جوان اگر ایک جانب شرپسندوں اور جرائم پیشہ افراد کے خلاف مسلسل کامیابی پہ کامیابی حاصل کررہے ہیں تو دوسری جانب کھیلوں کے میدان میں بھی اپنی بہترین کارکردگی سے تاریخ رقم کرکے پولیس کا سافٹ امیج اُجاگر کررہے ہیں ۔

ان خیالات کا اظہار انہوں نے منگل کو سنٹرل پولیس آفس پشاور میں صوبائی سطح پر پہلا شہداءپولیس انٹرریجنل سپورٹس مقابلوں میں بہترین کارکردگی پر ٹیموں اور کھلاڑیوں میں میڈلز اور ٹرافیاں تقسیم کرنے کی ایک سادہ مگر پر وقار تقریب سے خطاب کرتے ہوئے کیا۔

(جاری ہے)

واضح رہے کہ آئی جی پی ذوالفقار حمید کی ہدایت پر پہلے شہدائے پولیس کے نام سے مختلف کھیلوں کے مقابلوں کا انعقاد کیا گیا۔

پہلے مرحلے میں ریجنل سطح پر انٹر ڈسٹرکٹ سپورٹس مقابلوں کا انعقاد کیا گیا جس میں کرکٹ، فٹ بال، والی بال اور بیڈمنٹن ( مرد و خواتین) کے مقابلے ہوئے۔ ان مقابلوں کی افتتاحی و اختتامی تقاریب میں پولیس شہداءکے اہل خانہ کو بطور مہمان خصوصی مدعو کیا گیا۔ ٹورنامنٹ کے دوسرے مرحلے میں صوبائی سطح پر انٹر ریجنل سپورٹس مقابلوں کا انعقاد کیا گیا جس میں خیبر پختونخوا پولیس کے ساتوں ریجنز کی ٹیموں نے حصہ لیا اور اعلیٰ کارکردگی کا مظاہرہ کیا۔

فٹ بال، والی بال اور بیڈمنٹن (مردوں) کے تمام فائنلز میں ملاکنڈ ریجن نے بہترین کھیل پیش کرتے ہوئے پہلی پوزیشن حاصل کی۔ بیڈمنٹن ( خواتین) کا فائنل کیپٹل سٹی پولیس پشاور کی ٹیم نے اپنے نام کیا۔ تمام تقریبات میں شہداءکے اہل خانہ نے بطور خاص شرکت کرکے اپنی موجودگی سے ان تقاریب کو چار چاند لگایا ۔ بیڈمنٹن ( خواتین) کے مقابلوں میں مردان ریجن، والی بال میں کیپٹل سٹی پولیس پشاور او ر فٹ بال میں بنوں ریجن نے رنراپ ٹرافیاں جیتیں۔

اس موقع پر تقریب سے خطاب کرتے ہوئے ایڈیشنل آئی جی پی آپریشنز محمد علی بابا خیل نے کہا کہ پولیس فورس کے جوانوں کو ہروقت انتہائی کٹھن اور مشکل فرائض کی وجہ سے شدید دباﺅ سے گزرنا پڑتا ہے ایسے میں کھیلوں کی صحت مند سرگرمیوں سے ان کو ذہنی اور جسمانی طور پر تندرست رکھا جاسکتا ہے۔ انہوں نے کہا کہ آئی جی پی ذوالفقار حمید کی کوششوں سے پولیس فورس میں خوشگوار تبدیلیاں رونما ہوئی ہیں کہ انہوں نے دہشت گردی کے خلاف نبردآزما پولیس جوانوں کی حوصلہ افزائی کے لیے ترقیوں اور انعامات کا سلسلہ بہت تیزی سے شروع کیا۔

ایڈیشنل آئی جی پی نے کہا کہ پولیس شہداءکی خدمات کے اعتراف میں شہداءپولیس سپورٹس مقابلوں کا انعقاد ایک اچھا قدم ہے اور اس کو آئندہ بھی جاری وساری رکھا جائیگا۔ایڈیشنل آئی جی پی نے کہا کہ پولیس اس معاشرے کا اہم جز ہے اور ان کی حوصلہ افزائی کے لیے ضروری ہے کہ ترقی یافتہ ممالک کی طرح ان کی خدمات کا اعتراف سول سوسائٹی کی سطح پر بھی ہو۔

ایڈیشنل آئی جی پی کا مزید کہنا تھا کہ بہترین ٹیم ورک سے اچھی پولیسنگ عمل میں آتی ہے اور پولیس کھلاڑیوں پر زور دیا کہ وہ کھیلوں کی سرگرمیوں کے ساتھ ساتھ عوام کی بے لوث خدمت کو اپنا شعار بنا کر پولیس فورس کی مجموعی ساکھ کو بہتر بنانے کے لیے اپنی صلاحیتوں کو بروئے کار لائیں۔ ایڈیشنل آئی جی پی نے پہلا شہداءپولیس سپورٹس مقابلوں کے کامیاب انعقاد پر ڈائریکٹر سپورٹس اے آئی جی اسٹبلشمنٹ سونیا شمروز خان کی دن رات انتھک محنت اور کوششوں کی تعریف کی اور ان صلاحیتوں پر بھر پور اعتماد کا اظہار کیا۔

قبل ازیں مہمان خصوصی ایڈیشنل آئی جی پی آپریشنز محمد علی بابا خیل، ایڈیشنل آئی جی پی ہیڈ کوارٹرز عباس احسن اور کمانڈنٹ ایلیٹ فورس محمد طاہر خان نے جیتنے والی ٹیموں اور رنرآپ ٹیموں کے کھلاڑیوں کو میڈلز پہنائے اور ان میں ٹرافیاں اور سرٹیفیکٹس تقسیم کئے۔ اس موقع پر ڈیوس کپ میں نمائندگی پر مایہ ناز کھلاڑیوں برکت اللہ، سافٹ بال میں متعدد میڈلز جیتنے پر سیدہ ثمرین ہاشمی اور قومی و بین الاقوامی سطح پر باڈی بلڈنگ میں شاندار کارکردگی پر اعجاز احمد کو خصوصی انعامات اور توصیفی اسناد سے بھی نوازا گیا۔