خواتین یونیورسٹی ملتان میں جشن آزادی اور معرکہ حق کی تقریبات شروع

ملتان (اُردو پوائنٹ اخبارتازہ ترین - اے پی پی۔ 13 اگست2025ء) خواتین یونیورسٹی ملتان میں جشن آزادی اور معرکہ حق کی تقریبات شروع ہوگئیں۔خواتین یونیورسٹی ملتان میں جشن آزادی اور معرکہ حق آپریشن بنیان مرصوص کی کامیابی منانے کےلئے دو روزہ تقریبات شروع ہوگئیں ۔پہلے روز کھیلوں کے مقابلے اور واک کی گئی۔ پاک افواج کو خراج تحسین پیش کرنے کےلئے ایڈمن بلاک سے گیٹ نمبرایک تک واک کا انعقاد کیا گیا ۔

جس کی قیادت وائس چانسلر پروفیسرڈاکٹر کلثوم پراچہ نے کی۔ شرکا سے خطاب کرتے ہوئے وائس چانسلرڈاکٹر کلثوم پراچہ نے کہا کہ 78واں جشن آزاد ی دوہری خوشی لیکر آیا ہے۔ رواں برس ہماری افواج نے معرکہ حق اپنے نام کیا ۔جشن آزادی اور معرکہ حق نے قوم کی خوشیاں دوبالا کردی ہیں۔

(جاری ہے)

آپریشن بُنْیَانٌ مَّرْصُوْصٌ میں دشمن کی عددی برتری کو عسکری مہارت سے شکست دینے اور تاریخی کامیابی حاصل کرنے کادن ہے۔

پاکستان ایک پُرامن ملک ہے، جو اپنی سرحدوں، خودمختاری اور وقار کے تحفظ کی بھرپور صلاحیت رکھتا ہے۔ افواجِ پاکستان کی یہ شاندار فتح اُمتِ مسلمہ کے لیے اتحاد، حوصلے اور قیادت کا پیغام ہے مسلح افواج کی قربانیوں اور کامیابیوں پر اللہ تعالی کا شکر ادا کرنے کا دن ہے۔ آپریشن 'بنیان مرصوص' میں افواجِ پاکستان نے دشمن کے ناپاک عزائم کو ناکام بنایا اور قوم کو فخر کا موقع فراہم کیا۔

ہم اپنے شہدا کو خراجِ عقیدت پیش کرتے ہیں ۔ پوری قوم متحد ہو کر ہر چیلنج کا مقابلہ کر سکتی ہے۔ہماری افواج ہماری طاقت ہیں اور ہم ان کے ساتھ چٹان کی طرح کھڑے ہیں۔ رجسٹرار ڈاکٹر ملکہ رانی نے کہا کہ معرکہ حق کی تقریب ہماری قومی یکجہتی، ہماری اجتماعی ہمت اور کسی بھی خطرے کے خلاف ہماری مسلح افواج کے شانہ بشانہ کھڑے ہونے کی نمائندگی کرتی ہے۔

یہ ایک یاد دہانی ہے کہ ہم ایک مضبوط قوم ہیں، اور اپنے مستقبل پر فخر کرتے ہیں۔ بعد ازاں، وائس چانسلر پروفیسر ڈاکٹر کلثوم پراچہ نے معرکہ حق سپورٹس گالا کا افتتاح کیا مختلف کھیلوں کے مقابلے ہوئے جن میں بیڈمنٹن ، کرکٹ، ریلے ریس،ٹیبل ٹینس،اوررسہ کشی کے مقابلے ہوئے۔ جن میں طالبات نے بھرپور شرکت کی۔ وائس چانسلر پروفیسر ڈاکٹر کلثوم پراچہ نے کہا کہ یوم آزادی کی تقریبات کا مقصد نوجوانوں میں جذبہ حب الوطنی،اور صحت مندانہ تفریحی سر گرمیوں کو فروغ دینا ہے۔

انہوں نے نوجوانوں پر زور دیا کہ وہ کھیلوں میں بڑھ چڑھ کر حصہ لیں، تاکہ دنیا میں پاکستان کا مثبت امیج اجاگر ہو۔تقریب میں خزانہ دار ڈاکٹر سارہ مصدق، ڈائریکٹر سٹوڈنٹس افیئرز ڈاکٹرعدیلہ سعید ،اساتذہ ، انتظامی سٹاف اور طالبات نے بھرپور شرکت کی۔ آج 14اگست کوصبح آٹھ بجے پرچم کشائی ہوگی یونیورسٹی سیکورٹی فورس گارڈ آف آنر پیش کرے گی۔ دعا کے بعد شجرکاری مہم کاآغاز کیا جائے گا،وائس چانسلر اورمہمان خصوصی کے خطاب کے بعد تمام ملازمین افسروں میں سرٹیفکیٹس تقسیم کئے جائیں گے اورکیک کاٹا جائے گا۔