پشاور، خیبرپختونخوا فوڈ سیفٹی اتھارٹی کی مختلف کارروائیاں،900 لیٹرزمضر صحت دودھ تلف

بدھ 13 اگست 2025 17:12

پشاور (اُردو پوائنٹ اخبارتازہ ترین - اے پی پی۔ 13 اگست2025ء) خیبرپختونخوا فوڈ سیفٹی اینڈ حلال فوڈ اتھارٹی کی فوڈ سیفٹی ٹیموں نے پشاور، مردان اور سوات میں بڑے پیمانے پر کارروائیاں کرتے ہوئے مضر صحت اور جعلی مشروبات کی بھاری مقدار برآمد کر لیں اور موقع پر تلف کر دی۔ترجمان فوڈ اتھارٹی نے کارروائیوں کے حوالے سے تفصیلات جاری کرتے ہوئے بتایا کہ پشاورفوڈ سیفٹی ٹیم نے جی ٹی روڈ چمکنی پشاورپرخوردنوش اشیاء لے جانے والی گاڑیوں کی چیکنگ کی اورموبائل فوڈ ٹیسٹنگ لیبارٹری سے نمونے چیک کیے گئے جس کے دوران ایک گاڑی سے 2000 لیٹرز سے زائد جعلی اورمس لیبل مشروبات برآمد کر کے ضبط کیے گئے۔

ترجمان فوڈ اتھارٹی کا کہنا تھا کہ سوات فوڈ سیفٹی نے شانگلہ کے داخلی راستے پرناکہ بندی کی جس کے دوران ایک گاڑی سے 700 لیٹرز سے زائد مضر صحت کیمیکل فارملین ملا دودھ برآمد کرکے تلف کیا گیا، ایک اورکارروائی میں 60 کلو باسی اورناقص مچھلی بھی موقع پرتلف کر دی گئی، اسی طرح مردان فوڈ سیفٹی ٹیم نے بھی ضلعی انتظامیہ کے ہمراہ شمسی روڈ پرجدید موبائل فوڈ ٹیسٹنگ لیبارٹری کے ذریعے بھی دودھ کے نمونوں کی جانچ کے بعد ایک دودھ فروش سے 240 لیٹرز مضر صحت امونیا اورپاؤڈرملک ملا دودھ ثابت ہونے پرتلف کردیا گیا جبکہ دکان کو سیل کردیا۔

(جاری ہے)

تفصیلات میں مزید بتایا گیا کہ تمام کارروائیوں میں حفظانِ صحت کے اصولوں کی خلاف ورزی پرمالکان پربھاری جرمانے عائد کیے گئے اورفوڈ سیفٹی ایکٹ کے تحت مزید کارروائی کا بھی آغاز کردیا گیا۔