قائم مقام گورنر پنجاب ملک احمد خان سے چین کے قونصل جنرل ژا ئوشیرین کی ملاقات

بدھ 13 اگست 2025 22:41

لاہور (اُردو پوائنٹ اخبارتازہ ترین - این این آئی۔ 13 اگست2025ء) قائم مقام گورنر پنجاب ملک محمد احمد خان سے گورنر ہائوس لاہور میں چین کے قونصل جنرل ژا ئوشیرین نے ملاقات کی۔ملاقات میں پاک چین تعلقات کے فروغ، سی پیک کے منصوبوں اور نئے شعبوں میں تعاون بڑھانے پر تبادلہ خیال کیا گیا۔ملاقات کے دوران دونوں ممالک کے درمیان پارلیمانی وفود کے تبادلوں پر بھی اتفاق کیا گیا۔

اس موقع پر گفتگو کرتے ہوئے قائم مقام گورنر پنجاب ملک محمد احمد خان نے کہا کہ پاک چین تعلقات کی جڑیں گہری ہیں اور باہمی احترام، اعتماد اور محبت پر مبنی ہیں۔اُنہوں نے کہا کہ چین ہر مشکل گھڑی میں ہمیشہ پاکستان کے ساتھ کھڑا رہا ہے۔قائمقام گورنر پنجاب نے کہا کہ پاکستان کی تعمیر و ترقی میں چین کے تعاون کو قدر کی نگاہ سے دیکھتے ہیں۔

(جاری ہے)

اُنہوں نے کہا کہ سی پیک نہ صرف پاکستان کی ترقی بلکہ خطے کی خوشحالی کی کلید ہے۔

قائمقام گورنر نے کہا کہ پاکستان چائنہ اقتصادی راہداری منصوبہ پاکستان میں ترقی اور خوشحالی لے کر آئے گیا۔ اُنہوں نے کہا کہ حکومت نے سی پیک منصوبوں پر کام کی رفتار تیز کر دی ہے۔قائمقام گورنر نے مزید کہا کہ پاکستان اور چین کے درمیان عوامی سطح پر بھی رابطے مضبوط ہیں۔ چینی قونصل جنرل ژائوشیرین نے کہا کہ عوامی جمہوریہ چین پاکستان کے ساتھ اپنی دوستی کو بہت اہمیت دیتا ہے۔

اُنہوں نے کہا کہ پاکستان کے ساتھ تعلیم، زراعت، غربت کے خاتمے، صحت کے شعبے میں تعاون اور شراکت داری کو بڑھایا جائے گا۔ چینی قونصل جنرل نے کہا کہ زرعی تحقیق میں پاکستان اور چین کی یونیورسٹیوں کے ساتھ تعاون کو بڑھایا جائے گا۔چینی قونصل جنرل نے قائم مقام گورنر کو عوامی جمہوریہ چین کے قومی دن کے موقع پر بطور مہمان خصوصی مدعو بھی کیا۔