ڈپٹی کمشنر سوات کی زیر صدارت ضلعی انسدادِ پولیو کمیٹی کا اجلاس

بدھ 13 اگست 2025 22:46

پشاور (اُردو پوائنٹ اخبارتازہ ترین - اے پی پی۔ 13 اگست2025ء) ڈپٹی کمشنر سوات سلیم جان کی زیر صدارت ضلعی انسدادِ پولیو کمیٹی کا اہم اجلاس منعقد ہوا جس میں چار روزہ مہم کے انتظامات اور تیاریوں کا تفصیلی جائزہ لیا گیا۔ ضلع سوات میں یکم سے 4 ستمبر2025 ء تک پولیو سے بچاو کی قومی مہم بھرپور طریقے سے چلائی جائے گی۔بدھ کو منعقدہ اجلاس میں ایڈیشنل ڈپٹی کمشنر، ڈی پی او سوات، تمام اسسٹنٹ کمشنرز (ویڈیو لنک کے ذریعے)، ڈسٹرکٹ ہیلتھ آفیسر، ای پی آئی کوآرڈینیٹر، این سٹاپ آفیسر، محکمہ تعلیم، صحت، لوکل گورنمنٹ، پولیس اور دیگر متعلقہ اداروں کے نمائندوں نے شرکت کی۔

این سٹاپ آفیسر ڈاکٹر انور جمال نے اجلاس کو مہم کے مقاصد، حکمتِ عملی اور عملی اقدامات پر تفصیلی بریفنگ دی۔

(جاری ہے)

مہم کے دوران تربیت یافتہ ٹیمیں گھر گھر جا کر پانچ سال سے کم عمر بچوں کو پولیو سے بچاؤ کے قطرے پلائیں گی۔ اس مقصد کے لیے طبی عملہ، انتظامی افسران اور متعلقہ محکموں پر مشتمل ٹیمیں تشکیل دی گئی ہیں جو نظم و ضبط اور ذمہ داری کے ساتھ اپنا فریضہ انجام دیں گی۔

ضلعی اور یونین کونسل سطح پر مؤثر نگرانی کا نظام وضع کیا گیا ہے تاکہ مہم کی شفافیت اور معیار کو یقینی بنایا جا سکے۔ڈپٹی کمشنر سوات سلیم جان نے عوام سے پرزور اپیل کی کہ وہ پولیو ٹیموں سے بھرپور تعاون کریں اور اپنے پانچ سال سے کم عمر بچوں کو لازمی طور پر حفاظتی قطرے پلائیں۔ انہوں نے کہا کہ بطور ذمہ دار شہری ہمارا فرض ہے کہ ہم اس مہلک مرض کے مکمل خاتمے کے لیے حکومت کے ساتھ کندھے سے کندھاملا کرچلیں۔