اسپیکر قومی اسمبلی کی جانب سے 78 ویں یومِ آزادی اور "معرکہ? حق" میں تاریخی فتح پر قوم کو مبارکباد

اسلام آباد(اُردو پوائنٹ اخبارتازہ ترین - آن لائن۔ 13 اگست2025ء) اسپیکر قومی اسمبلی سردار ایاز صادق نے 78 ویں یومِ آزادی اور "معرکہ? حق" میں تاریخی فتح کے پر پوری قوم کو مبارکباد پیش کرتے ہوئے کہا کہ بھارتی جارحیت کے خلاف یہ عظیم کامیابی جشنِ آزادی کی خوشیوں کو دوبالا کرنے کا باعث بنی ہے۔ انہوں نے کہا کہ آزادی ایک عظیم نعمت ہے، جس کا جتنا شکر ادا کیا جائے کم ہے، اور اس کی حفاظت ہم سب کی مشترکہ ذمہ داری ہے۔

انہوں نے مزید کہا کہ پاکستان کا قیام ہمارے اسلاف کی لازوال قربانیوں اور بانیانِ پاکستان کی طویل جدو جہد و انتھک محنت کا ثمر ہے۔ انہوں نے کہا کہ برصغیر کے مسلمانوں نے اپنا گھر بار، جائدادیں اور جانوں تک سب کچھ قربان کر کے ہمارے لیے ایک آزاد اور خود مختار ریاست کے حصول کو ممکن بنایا۔

(جاری ہے)

انہوں نے کہا کہ اسلاف کی قربانیاں ہمارے لیے مشعل راہ ہیں۔

اسپیکر قومی اسمبلی نے کہا کہ آج کا دن اس عہد کی تجدید کے اعادہ کا دن کہ مادرِ وطن کے خلاف کسی بھی جارحیت کی صورت میں استقامت اور یکجہتی کے ساتھ دفاع وطن کے لیے کسی بھی قربانی سے دریغ نہیں کریں اور ملکی ترقی و خوشحالی کے لیے باہمی اختلافات کو پسِ پشت ڈال کر متحد ہو کر کام کریں گے۔ اس موقع پر انہوں نے پاکستان کی بری، بحری اور فضائی افواج کو خراجِ تحسین پیش کرتے ہوئے کہا کہ رواں سال 6 تا 10 مئی کے دوران ہونے والی بھارتی جارحیت کے خلاف"معرکہ? حق" میں پاکستان کی جری افواج نے فیلڈ مارشل سید عاصم منیر کی ولولہ انگیز قیادت میں اپنے سے کئی گنا بڑی افواج کو شکست دے کر ملکی تاریخ میں سنہری باب رقم کیا۔

انہوں نے کہا کہ یہ کارنامہ ہمیشہ یاد رکھا جائے گا۔سردار ایاز صادق نے کہا کہ بھارتی جارحیت کے دوران پاکستانی قوم نے جس اتحاد، حوصلے اور استقامت کا مظاہرہ کیا اور مسلح افواج کے شانہ بشانہ سیسہ پلائی دیوار کی مانند کھڑے رہے، وہ لائقِ تحسین ہے۔انہوں نے کہا کہ پاکستانی قوم نے ہر کھڑے وقت میں اپنی بہادر مسلح افواج کے ساتھ مل کر دشمن کے ناپاک عزائم کو اتحاد اور قومی عزم کے ذریعے ناکام بنایا ہے۔

انہوں نے مادر وطن کے دفاع اور ملک سے فتنہ الہندوستان کے خاتمے کیلئے جانوں کے نذرانہ پیش کرنے والے شہدائ کو خراج عقیدت پیش کرتے ہوئے کہا کہ آج ہم شہدائ کی قربانیوں کی بدولت آزادی کی خوشیاں منا رہے ہیں جنہوں نے اپنا آج قوم کے کل پر قربان کیا۔اسپیکر قومی اسمبلی نے کہا کہ پارلیمان پاکستان کے 25 کروڑ عوام کا نمائندہ ادارہ ہے اور عوام کو درپیش مسائل کا حل موثر قانون سازی اور جامع پالیسیوں کے ذریعے ممکن ہے۔

انہوں نے اراکین پارلیمنٹ سے کہا کہ وہ سیاسی وابستگیوں سے بالا تر ہو کر ملکی استحکام اور عوام کو درپیش چیلنجوں کے حل کیلئے اپنا کردار ادا کریں۔انہوں نے کہا کہ آپریشن بنیان المرصوص کے دوران اراکین پارلیمنٹ نے جس اتحاد اور یکجہتی کا مظاہرہ کیا ہے وہ لائق تحسین ہے۔انہوں نے فلسطین اور کشمیر کی عوام سے یکجہتی کا اظہار کرتے ہوئے کہا کہ فلسطین اور کشمیر کے عوام گزشتہ کئی دہائیوں سے اپنی خودارادیت کی جدو جہد جاری رکھے ہوئے ہیں۔

انہوں نے کہا کہ پاکستان کی پارلیمان فلسطین اور کشمیری عوام کے حق خود ارادیت کے حصول تک انکی سیاسی، سفارتی، پارلیمانی اور اخلاقی حمایت جاری رکھے گا۔اسپیکر قومی اسمبلی نے کہا کہ نوجوان ملک کا قیمتی اثاثہ ہیں۔انہوں نے نوجوان نسل پر زور دیا کہ وہ آزادی کی حقیقی روح کو سمجھیں اور جدید سائنسی علوم اور ٹیکنالوجی میں مہارت حاصل کر کے پاکستان کی ترقی و خوشحالی میں اپنا کلیدی کردار ادا کریں۔