زندہ قومیں اپنا یوم آزادی تعمیری سوچ کے ساتھ مناتی ہیں، وزیر ٹرانسپورٹ

لاہور (اُردو پوائنٹ اخبارتازہ ترین - اے پی پی۔ 13 اگست2025ء) پنجاب روڈ سیفٹی اتھارٹی کے زیر اہتمام یوای ٹی میں *محفوظ سفر محفوظ پاکستان* کے عنوان سے سیمینار اور واک کا انعقاد کیا گیا جس میں ٹرانسپورٹ،، ٹریفک پولیس اور ریسکیو 1122 کے حکام سمیت یونیورسٹی کے اسٹوڈنٹس کی بڑی تعداد نے شرکت کی۔ صوبائی وزیر ٹرانسپورٹ اینڈ ماس ٹرانزٹ بلال اکبر خان نے سیمینار میں بطور مہمان خصوصی شرکت کی۔

اس موقع پر ڈائریکٹر پنجاب روڈ سیفٹی اتھارٹی ڈاکٹر احمد خاور شہزاد نے شرکا کو بریفنگ دیتے ہوئے بتایا کہ پنجاب روڈ سیفٹی اتھارٹی کے قیام کا مقصد محفوظ ٹرانسپورٹیشن کو یقینی بنانا ہے اور یہی وجہ ہے کہ حادثات کی روک تھام کیلئے موٹر بائیکس کی حد رفتار 60کلومیٹر فی گھنٹہ مقرر کی گئی ہے۔

(جاری ہے)

ان کا مزید کہنا تھا کہ وزیر اعلی پنجاب مریم نواز کی ہدایات کی روشنی میں پنجاب روڈ سیفٹی اتھارٹی کے تحت سڑکوں کا معیار اور ان کی حفاظت کیلئے بہترین اقدامات کو بھی یقینی بنایا جائیگا۔

پی آر ایس اے کے تحت پاکستان کے 78ویں جشن آزادی کے موقع پر پہلے ایسے سیمینار کو منعقد کرنے کا مقصد بھی یہی ہے کہ لوگوں میں ٹریفک رولز سے آگاہی کیساتھ ساتھ ایک زمہ دار شہری ہونے کا احساس بھی اجاگر کروایا جا سکے۔ بلال اکبر خان نے روڈ سیفٹی کی پہلی آگاہی مہم کے کامیاب انعقاد پرپی آر ایس اے کے اقدام کو سراہا اور شرکا سے خطاب میں کہا کہ سفر کو محفوظ بنانے اور ٹریفک حادثات کی روک تھام کیلئے حکومت تمام ضروری اقدامات بروئے کار لا رہی ہے۔

زیادہ تر حادثات اوور سپیڈنگ کی وجہ سے پیش آتے ہیں جبکہ ڈرائیورز کی ٹریننگ کیساتھ ساتھ محفوظ ڈرائیونگ کیلئے شعوری مہمات بھی بہت ضروری ہیں۔ ہمارے ملک میں موٹر بائیکس حادثات کی شرح سب سے زیادہ تقریبا 65فیصد ہے جو ایک خطرناک صورتحال ہے۔ صوبائی وزیر کا مزید کہنا تھا کہ پنجاب میں ٹرانسپورٹ کے نظام میں مسلسل انقلابی تبدیلیاں لا رہے ہیں جبکہ وزیر اعلی پنجاب مریم نواز عوام کی زندگیوں کو محفوظ و پرسکون بنانے کیلئے ہر ضروری اقدام اٹھا رہی ہیں۔

ہم سستی اور معیاری پبلک ٹرانسپورٹ کیلئے الیکٹرک اور ایکو فرینڈلی ٹرانسپورٹ پر شفٹ ہو رہے ہیں۔ اس کے علاوہ سواری سے خودمختاری بائیکس سکیم کے تحت 20ہزار سے زائد اسٹوڈنٹس کو بائیکس اپن حکومت کے پہلے ہی سال فراہم کی گئی ہیں۔ کچھ عرصہ قبل 27 الیکٹرک بسوں کیساتھ لاہور میں ایکو فرینڈلی ٹرانسپورٹ کا آغاز کر چکے ہیں جبکہ پنجاب کیدیگر تمام اضلاع میں بھی سینکڑوں الیکٹرک بسیں آئندہ چند ہفتوں میں چلانے جا رہے ہیں۔

ہمارا عزم ہے کہ عوام کو مزید جدید اور محفوظ سفری سہولیات فراہم کریں۔ پاکستان کے 78 ویں جشن آزادی کے موقع پر ان کا کہنا تھا کہ زندہ قومیں اپنا یوم آزادی تعمیری سوچ کے ساتھ مناتی ہیں اس لیے اس یوم آزادی پر ہمیں محفوظ سفر اور باشعور قوم بننے کا دوبارہ عہد کرنا چاہیے۔ آج اپنی اور دوسروں کی جانوں کی حفاظت کیلئے ٹریفک قوانین کی پاسداری کرنے کا عزم بھی کریں۔ سیمینار سے ڈائریکٹر پنجاب روڈ سیفٹی اتھارٹی ڈاکٹر احمد خاور شہزاد اور وائس چانسلریوای ٹی ڈاکٹر شاہد منیر نے بھی خطاب کیا۔ سیمینار کے بعد آگاہی واک کا اہتمام بھی کیا گیا جس میں سٹوڈنٹس اور اساتذہ کی بڑی تعداد نے شرکت کی۔