بورڈ آف انٹرمیڈیٹ اینڈ سیکنڈری ایجوکیشن راولپنڈی کے زیر اہتمام یومِ آزادی جوش و جذبہ کے ساتھ منایا گیا

جمعرات 14 اگست 2025 17:50

اسلام آباد (اُردو پوائنٹ اخبارتازہ ترین - اے پی پی۔ 14 اگست2025ء) بورڈ آف انٹرمیڈیٹ اینڈ سیکنڈری ایجوکیشن راولپنڈی کے زیر اہتمام 78واں یومِ آزادی انتہائی جوش و جذبہ اور شان و شوکت کے ساتھ منایا گیا۔ اس موقع پر بورڈ کمپلیکس کو برقی قمقموں سے سجا دیا گیا جبکہ سبزہ زار لان میں ایک پروقار اور سادہ تقریب منعقد ہوئی۔ تقریب کے مہمانِ خصوصی چیئرمین تعلیمی بورڈ راولپنڈی محمد عدنان خان تھے۔

تقریب میں کنٹرولر امتحانات تنویر اصغر اعوان، سیکرٹری بورڈ امجد اقبال خٹک، افسران اور ملازمین کی بڑی تعداد نے شرکت کی۔ چیئرمین محمد عدنان خان نے پرچم کشائی کی اور ملکی سلامتی و ترقی کے لیے خصوصی دعا کروائی۔ قومی ترانہ بھی پیش کیا گیا اور شرکاء نے ہاتھوں میں پرچم تھامے وطن سے اپنی محبت کا اظہار کیا۔

(جاری ہے)

خطاب میں چیئرمین محمد عدنان خان نے کہا کہ پاکستان بے شمار قربانیوں کے بعد حاصل ہوا ہے اور اس کی حفاظت ہم سب کی ذمہ داری ہے۔

زندہ قومیں اپنی آزادی کا جشن بھرپور طریقے سے مناتی ہیں، اور آزادی ایک عظیم نعمت ہے جس کا شکر ادا کرنا ہم سب پر فرض ہے۔تقریب کے اختتام پر جشنِ آزادی کے موقع پر کیک کاٹا گیا اور شرکاء میں مٹھائی تقسیم کی گئی۔ فضا پاکستان زندہ باد کے نعروں سے گونج اٹھی اور ملکی ترقی، امن و خوشحالی کے لیے خصوصی دعائیں کی گئیں۔