یوم آزادی ، 41 اضلاع میں بیک وقت آتش بازی اور لیزر شوز کا نیا ریکارڈ قائم

جمعرات 14 اگست 2025 22:10

لاہور (اُردو پوائنٹ اخبارتازہ ترین - اے پی پی۔ 14 اگست2025ء) یوم آزادی پر پنجاب بھر میں جشن کی نئی تاریخ رقم ہو گئی، تمام41 اضلاع میں بیک وقت آتش بازی اور لیزر شوز کا نیا ریکارڈ قائم ہوگیاہے۔ وزیراعلیٰ مریم نواز کی ہدایت پر تمام اضلاع میں 78ویں یوم آزادی پر خصوصی انتظامات کیے گئے تھے۔ لاہور، راولپنڈی اور مری سمیت تمام اضلاع میں رات 12بجے آتش بازی نے یوم آزادی کی رات کو چاند رات بنا دیا ۔

گھڑی کے 12بجتے ہی خوبصورت رنگ فضاں میں پھیل گئے، ہزاروں شہریوں نے بچوں اور اہل خانہ سمیت شرکت کی۔ اتنی بڑی تعداد میں سرکاری سطح پر بیک وقت تقریبات کا یہ اپنی نوعیت کا پہلا واقعہ ہے ۔ آتش بازی اور لیزر لائٹس شوز کے ساتھ ساتھ میوزک کنسرٹس کا بھی اہتمام کیا گیا تھا۔ ڈرونز کے ذریعے ڈیجیٹل شو کو بھی شہریوں نے بے حد پسند کیا، بچوں اور خواتین نے خصوصی دلچسپی لی ۔

(جاری ہے)

فنکاروں نے دل دل پاکستان اور دیگر ملی نغمے پیش کرکے شہریوں کو جھومنے پر مجبور کر دیا ۔ راستوں، شاہراہوں، چوراہوں، سرکاری و نجی عمارتوں، پارکس اور بازاروں پر چراغاں نے جشن آزادی کا حسن مزید بڑھا دیا ۔ وزیراعلیٰ کی اپیل پر پنجاب بھر میں شہریوں نے گھروں، گاڑیوں اور بائیکس پر قومی پرچم لہرایا ۔ وزیراعلی مریم نواز کی ہدایت پر یکم اگست سے تقریبات کا آغاز کیا گیا تھا ۔ تقریبات کے موقع پر سکیورٹی اور صفائی کے خصوصی انتظامات کئے گئے تھے ۔ تمام اضلاع میں صدر دفاتر پر قومی پرچم لہرانے کی خصوصی تقاریب بھی منعقد ہوئیں ۔