تمام صنعتی اور اسپیشل اکنامک زونز کیلیے ایک پوائنٹ پر بجلی فراہمی میں بڑی پیش رفت

جمعہ 15 اگست 2025 17:31

کراچی(اُردو پوائنٹ اخبارتازہ ترین - این این آئی۔ 15 اگست2025ء)تمام صنعتی اور اسپیشل اکنامک زونز کے لیے ایک پوائنٹ پر بجلی فراہمی میں پاور ڈویژن کی جانب سے بڑی پیش رفت ہوئی ہے۔پاور ڈویژن کی جانب سے تمام صنعتی اور اکنامک زونز میں بجلی کی فراہمی اور بلنگ سے متعلق فوری اقدامات کے احکامات جاری کیے گئے ہیں۔ وفاقی وزیر توائی اویس لغاری نے نیپرا کے فیصلے کے مطابق بجلی تقسیم کار کمپنیوں کو فوری ان زونز کی انتظامیہ کے ساتھ رابطہ کرنے کے احکامات جاری کیے ہیں۔

پاور ڈویژن نے کابینہ سے اجازت کے بعد 25فروری کو نیپرا میں ان زونز کو ایک پوائنٹ پر بجلی فراہمی سے متعلق درخواست دی تھی ، جس پر نیپرا نے مشاورت کے بعد 11اگست کو ان زونز کے ساتھ گفت و شنید کی بنیاد پر حتمی معاہدات کرنے کی ہدایت دی تھی ۔

(جاری ہے)

وفاقی وزیر پاور ڈویژن اویس لغاری نے تمام بجلی تقسیم کار کمپنیوں کو اسپیشل اکنامک زونز اور انڈسٹریل اسٹیٹس کے ساتھ فوری عمل کرنے کی ہدایات جاری کی ہیں۔

انہوں نے تمام کمپنیوں کو فوری نیپرا کی ہدایات کے مطابق معاہدات فائنل کرنے کے احکامات جاری کردیے ہیں۔بجلی تقسیم کار کمپنیاں اب فوری طور پر ان معاہدوں کی روشنی میں ان زونز کو ایک پوائنٹ پر بجلی فراہم کریں گی ۔ اس عمل سے بجلی تقسیم کار کمپنیوں کی بے جا مداخلت اور کرپشن کا تدارک کیا جا سکیگا۔