امریکا،بچوں سمیت درجنوں افراد سے جبری مشقت لینے پر بھارتی نژاد خاندان گرفتار

واشنگٹن (اُردو پوائنٹ اخبارتازہ ترین - اے پی پی۔ 15 اگست2025ء) امریکی حکام نے نیبراسکا میں ہوٹلز چلانے والے بھارتی نژاد خاندان کے 5 افراد کو گرفتار کر لیاہے،جن پر بچوں سمیت درجنوں افراد سے جبری مشقت لینے کے الزام ہےکشمیرمیڈیاسروس کے مطابق امریکی وفاقی پراسیکیوٹرز نے بھارتی نژاد خاندان کے 5 افراد پر الزام عائد کیا ہے، جنہیں محکمہ انصاف نے غیر قانونی تارکین وطن، بشمول کم سے کم 12 سال سے کم عمر کے 10بچوں کے استحصال پر مبنی بڑے پیمانے پر انسانی سمگلنگ آپریشن کا حصہ قرار دیا ہے۔

ملزمان پر الزام ہے کہ انہوں نے بچوں اور بالغوں دونوں کو دھمکیوں اور جبر کے ذریعے جبری مشقت پر مجبور کیا۔روزنامہ ڈان میں شائع ہونیوالی خبر کے مطابق ڈسٹرکٹ نیبراسکا کی امریکی اٹارنی سوزن لیہر نے کہا ہے کہ یہ کیس ایک ایسے خاندانی کاروبار کے بارے میں ہے جو انسانی استحصال پر مبنی تھا۔

(جاری ہے)

ملزمان نے مبینہ طور پر کمزور متاثرین، بشمول بچوں، کو دھمکیوں اور جبر کے ذریعے معمولی یا بغیر کسی معاوضے کے کام پر مجبور کر کے منافع کمایا۔

پانچوں ملزمان، جن میں کینٹاکمار چوہدری، رشمی اجیت سمانی، امیت پرہلادبھئی چوہدری، امیت بابو بھئی چوہدری اور مہیش کمار چوہدری شامل ہیں، جو کہ مبینہ طور پر ایسے ہوٹلز چلا رہے تھے جہاں غیر قانونی تارکین وطن کوابتر اور غیر محفوظ حالتوں میں کام پر مجبور کیا جاتا تھا۔رپورٹس کے مطابق متاثرین کو ہفتے کے سات دن طویل اوقات میں معمولی یا بغیر کسی تنخواہ کے کام کرنا پڑتا تھا اور اگر وہ انکار کرتے تو انہیں گرفتاری، ملک بدری اور اہل خانہ کو نقصان پہنچانے کی دھمکیاں دی جاتی تھیں۔

12اگست کو وفاقی، ریاستی اور مقامی حکام نے نیبراسکا کے ہوٹلز پر سرچ وارنٹ کے تحت چھاپے مارے، جن میں اومہا کے امیریک اِن، دی اِن، دی نیو وکٹورین اِن اور بیلویو کا روڈ وے اِن شامل ہیں۔محکمہ انصاف کے مطابق یہ جائیدادیں جبری مشقت کے ارتکاب کی سازش کے لیے استعمال ہو رہی تھیں اور ملزمان نے غیر قانونی تارکین وطن کو تجارتی فائدے اور ذاتی مالی فائدے کے لیے پناہ دینے کی سازش کی تھی۔

اس دوران کل 27متاثرین کو بازیاب کرایا گیا، جن میں 12سال سے کم عمر کے 10بچے جبری مشقت کے اس منصوبے سے اور اسی مجرمانہ سازش کے 17بالغ متاثرین شامل ہیں۔نیبراسکا میں یہ گرفتاریاں امریکی حکام کی انسانی اسمگلنگ کے نیٹ ورکس کو ختم کرنے کی وسیع تر مہم کا حصہ ہیں۔امریکی 2024ٹریفکنگ اِن پرسنز رپورٹ نے بھارت کو ٹائر 2میں رکھا ہے، جس میں کہا گیا ہے کہ بھارتی حکومت انسانی اسمگلنگ کے خاتمے کے لیے کم سے کم معیارات پر مکمل طور پر پورا نہیں اترتی لیکن اس ضمن میں نمایاں کوششیں کر رہی ہے۔

رپورٹ میں جبری مشقت، مذہبی و سیاحتی مقامات پر جنسی اسمگلنگ اور بچوں کے استحصال، بشمول چائلڈ سیکس ٹورزم، پر مستقل تشویش کا اظہار کیا گیا ہے۔نیبراسکا کے پانچوں ملزمان کو اب وفاقی الزامات کا سامنا ہے، جن میں سزا کی صورت میں انہیں کئی دہائیوں کی قید ہو سکتی ہے اور اس حوالے سے مزید تحقیقات بھی جاری ہیں۔