وزیراعظم خیبرپختونخوا اور آزادکشمیر میں امدادی کارروائیوں کی خود نگرانی کر رہے ہیں، وزیراطلاعات

جمعہ 15 اگست 2025 18:47

اسلام آباد (اُردو پوائنٹ اخبارتازہ ترین - این این آئی۔ 15 اگست2025ء)وفاقی وزیر اطلاعات عطاء اللہ تارڑ نے کہا ہے کہ وزیراعظم شہباز شریف نے نیشنل ڈیزاسٹر مینجمنٹ اتھارٹی ( این ڈی ایم اے ) کو آزاد کشمیر اور خیبر پختونخوا میں بھرپور امدادی کارروائیوں کی ہدایت کی ہے اور وہ امدادی کارروائیوں کی خود نگرانی کررہے ہیں۔اپنے بیان میں وفاقی وزیر اطلاعات عطاء اللہ تارڑ نے کہا ہے کہ وزیراعظم نے چیئرمین این ڈی ایم اے کو صوبائی حکومتوں سے مسلسل رابطے کی ہدایت دی۔

وفاقی وزیر اطلاعات نے کہا کہ وزیراعظم ہاؤس میں خصوصی سیل قائم کیا کردیا گیا ہے اور این ڈی ایم اے سے 24 گھنٹے رابطہ برقرار ہے۔عطاء اللہ تارڑ نے کہا کہ وزیراعظم تین بار این ڈی ایم اے کا دورہ کر کے ریلیف و ریسکیو اقدامات کا جائزہ لے چکے ہیں۔

(جاری ہے)

انہوں نے کہا کہ حکومت کا فوکس ریلیف اور ریسکیو اقدامات پر ہے اور خیبر پختونخوا میں تمام ادارے ریسکیو اور ریلیف آپریشن میں وسائل بروئے کار لا رہے ہیں۔

وفاقی وزیر نے کہا کہ خیبر پختونخوا میں 40 کے قریب افراد کے لاپتہ ہونے کی اطلاعات ہیں، انسانی جانوں کو محفوظ بنانے کے لئے ہنگامی اقدامات کیے جا رہے ہیں۔انہوں نے کہا کہ این ڈی ایم اے کا پیشگی آگاہی نظام صوبوں کو باقاعدہ معلومات فراہم کر رہا ہے اور این ڈی ایم اے کا کمانڈ اینڈ کنٹرول سینٹر 24 گھنٹے فعال ہے۔