صدرِزرداری اورسپیکرقومی اسمبلی کا بارشوں اور سیلاب سے ملک بھرمیں ہونے والے نقصان پر گہرے دکھ اور افسوس کااظہار

جمعہ 15 اگست 2025 20:23

اسلام آباد(اُردو پوائنٹ اخبارتازہ ترین - آن لائن۔ 15 اگست2025ء) صدرِ مملکت آصف علی زرداری اورسپیکر قومی اسمبلی سردار ایازصادق نے بارشوں اور سیلاب سے ملک بھرمیں ہونے والے نقصان پر گہرے دکھ اور افسوس کااظہا رکیا ہے ۔صدر آصف علی زرداری نے کہا کہ متاثرہ افراد کی مدد اور بحالی کے لیے ہر ممکن اقدامات کیے جائیں‘زخمی افراد کو فوری اور معیاری طبی سہولتیں فراہم کی جائیں ۔

سپیکرایازصادق نے کہا کہ قدرتی آفات سے بچاؤ کے لیے پیشگی حفاظتی اقدامات ناگزیر ہیں۔ایک بیان میں صدرِ مملکت آصف علی زرداری نے ملک کے مختلف علاقوں میں حالیہ بارشوں اور سیلاب سے قیمتی انسانی جانوں کے ضیاع پر گہرے دکھ اور افسوس کا اظہاراورجاں بحق افراد کے بلندی درجات کے لیے دعا اور لواحقین سے دلی اظہار ہمدردی کی۔

(جاری ہے)

صدر نے کہا کہ متعلقہ ادارے امدادی سرگرمیوں کو تیز کریں‘متاثرہ افراد کی مدد اور بحالی کے لیے ہر ممکن اقدامات کیے جائیں‘زخمی افراد کو فوری اور معیاری طبی سہولتیں فراہم کی جائیں۔

اسپیکر قومی اسمبلی سردارایازصادق نے گلگت بلتستان، خیبر پختونخوا اور آزاد کشمیر میں کلاؤڈ برسٹ اور سیلابی ریلوں سے جانی و مالی نقصان پر ِ افسوس اور جاں بحق افراد کے لواحقین سے دلی تعزیت اور ہمدردی کا اظہارکرتے ہوئے سیلابی ریلوں سے زخمی ہونے والوں کی جلد صحتیابی کے لیے دعاکی ۔اسپیکر سردار ایاز صادق نے متعلقہ اداروں کو فوری ریسکیو اور ریلیف آپریشن کی ہدایت کرتے ہوئے کہا کہ قدرتی آفات سے بچاؤ کے لیے پیشگی حفاظتی اقدامات ناگزیر ہیں؛اسپیکر سردار ایاز صادق نے گلگت بلتستان، خیبر پختونخوا اور آزاد کشمیر کے متاثرہ علاقوں کے عوام سے اظہارِ یکجہتی اور مختلف سانحات میں جاں بحق ہونے والوں کے لیے دعائے مغفرت اورلواحقین کو صبر جمیل عطا فرمانے کی دعاکی۔