Live Updates

سیلاب اور بارش سے متاثرہ اضلاع میں ہیلتھ ایمرجنسی نافذ، کنٹرول رومز قائم

جمعہ 15 اگست 2025 21:00

پشاور (اُردو پوائنٹ اخبارتازہ ترین - اے پی پی۔ 15 اگست2025ء) مشیر صحت خیبر پختونخوا احتشام علی کی خصوصی ہدایت پر صوبے کے سیلاب اور شدید بارش سے متاثرہ اضلاع میں ہیلتھ ایمرجنسی نافذ کر دی گئی ہے۔ متاثرہ اضلاع میں بونیر، سوات، مانسہرہ، باجوڑ، مہمند اور ایبٹ آباد شامل ہیں، جہاں حالیہ شدید بارشوں، لینڈ سلائیڈز اور فلیش فلڈز کے باعث جانی و مالی نقصان ہوا ہے۔

ڈائریکٹوریٹ جنرل ہیلتھ سروسز خیبر پختونخوا کے مطابق تمام ضلعی ہیلتھ آفیسرز، میڈیکل سپرنٹنڈنٹس اور میڈیکل ٹیچنگ انسٹیٹیوشنز کے ڈائریکٹرز کو ہدایت کی گئی ہے کہ اپنے اضلاع اور ہسپتالوں میں فلڈ کنٹرول رومز فوری طور پر قائم کریں اور روزانہ کی بنیاد پر امراض اور صورتحال کی رپورٹ متعلقہ حکام کو فراہم کریں۔

(جاری ہے)

اس اقدام کا مقصد ضروری ادویات کی فراہمی اور ہسپتالوں میں طبی سہولیات کی بلا تعطل فراہمی کو یقینی بنانا ہے۔

محکمہ صحت کی جانب سے جاری ہدایات میں کہا گیا ہے کہ تمام ڈاکٹرز، پیرامیڈیکس اور دیگر طبی عملہ ہائی الرٹ پر رہے اور کسی بھی ہنگامی صورتحال میں فوری ردعمل دے۔ تمام اضلاع میں صحت کے عملے کی چھٹیاں منسوخ کر دی گئی ہیں تاکہ ہسپتالوں میں بلا رکاوٹ علاج معالجہ جاری رکھا جا سکے۔مشیر صحت احتشام علی نے کہا ہے کہ صوبائی حکومت عوام کی صحت و سلامتی کو اولین ترجیح دیتی ہے، موجودہ ہنگامی صورتحال میں صحت کے تمام ادارے اور عملہ پوری طرح متحرک رہیں اور ضلعی انتظامیہ و ریسکیو ٹیموں کے ساتھ قریبی رابطہ رکھیں تاکہ بہتر اور بروقت خدمات فراہم کی جا سکیں۔