سی سی ڈی سے مبینہ مقابلوں میں مزید 2 ملزمان ہلاک

قتل، ڈکیتی ،پولیس مقابلوں کی 96 وارداتوں میں مطلوب کاشف سی سی ڈی کوتوالی کے ساتھ مبینہ مقابلے میں مارا گیا ٹیکسلا میںمارا گیا عامر شاہ بدنام زمانہ اشتہاری اور قتل کے بارہ مقدمات میں انتہائی مطلوب تھا،پولیس کے چیلنج بنا ہوا تھا

اتوار 17 اگست 2025 12:30

لاہور/ٹیکسلا(اُردو پوائنٹ اخبارتازہ ترین - این این آئی۔ 17 اگست2025ء)لاہور اور راولپنڈی میں کرائم کنٹرول ڈیپارٹمنٹ کے مبینہ مقابلوں میں مزید 2 ملزمان ہلاک ہوگئے۔لاہور میں پنجاب بھرمیں قتل، ڈکیتی اور پولیس مقابلوں کی 96 وارداتوں میں مطلوب ملزم کاشف سی سی ڈی کوتوالی کے ساتھ مبینہ مقابلے میں ہلاک ہوگیا۔حکام کے مطابق موٹرسائیکل سوار دو افراد کو ناکے پر روکا گیاتو انہوں نے پولیس پر سیدھی فائرنگ کردی،جوابی فائرنگ سے ملزم ہلاک ہوگیا۔

دوسری جانب راولپنڈی کے علاقے ٹیکسلا میں سی سی ڈی ٹیم کے ساتھ فائرنگ کے تبادلے میں بدنام زمانہ اشتہاری عامر شاہ ہلاک ہوگیا ۔ ملزم پر راولپنڈی اور سرگودھا میں قتل کے متعدد مقدمات درج تھے۔ذرائع کے مطابق ٹیکسلا میں موٹر سائیکل پر سوار ملزمان کو سی سی ڈی ٹیم نے مشکوک جان کر روکنے کی کوشش کی۔

(جاری ہے)

اس دوران ملزمان نے اہلکاروں پر فائرنگ کردی۔

جوابی کارروائی میں ملزم عامر شاہ زخمی حالت میں گرفتار ہوا لیکن ہسپتال منتقلی کے دوران دم توڑ گیا۔ فائرنگ کے تبادلے میں سی سی ڈی اہلکار محفوظ رہے جبکہ ملزم کے ساتھی موقع سے فرار ہوگئے۔ذرائع کے مطابق عامر شاہ بدنام زمانہ اشتہاری اور قتل کے بارہ مقدمات میں انتہائی مطلوب تھا۔ ملزم نے ماضی میں دینہ کے قریب اے این ایف اہلکاروں کو فائرنگ کرکے قتل کیا، عید کے دنوں میں جاتلی میں تین افراد کو قتل کیا، جبکہ تھانہ پھلروان سرگودھا کے علاقے میں خاتون کو اس کے والد اور بھائی سمیت قتل کرنے کے واقعات میں بھی ملوث رہا۔

قانون نافذ کرنے والے اداروں کے مطابق عامر شاہ سوشل میڈیا پر پولیس اور اداروں کے افسران کو دھمکیاں دیتا رہا اور طویل عرصے سے اداروں کے لیے ایک بڑا چیلنج بنا ہوا تھا۔

Facebook Twitter Google + Share on Whatsapp

سی سی ڈی سے مبینہ مقابلوں میں مزید 2 ملزمان ہلاک

متعلقہ عنوان :

مزید قومی خبریں