ہماری بہادر افواج کی بدولت ہی ہم اپنے گھروں میں سکون کی نیند سوتے ہیں،چوہدری شافع حسین

کھاریاں(اُردو پوائنٹ اخبارتازہ ترین - این این آئی۔ 18 اگست2025ء)چوہدری شافع حسین کا عدن آئی ٹی سینٹر میں وزیرِاعظم اسکل ڈویلپمنٹ پروگرام کے تحت تقسیمِ اسناد و انعامات کی تقریب میں بطورِ مہمانِ خصوصی شرکت صوبائی وزیرِ صنعت و تجارت چوہدری شافع حسین نے وزیرِاعظم یوتھ اسکل ڈویلپمنٹ پروگرام کے تحت عدن آئی ٹی سینٹر میں تقسیمِ انعامات کی تقریب میں بطورِ مہمانِ خصوصی شرکت کی۔

صوبائی وزیر نے تربیت مکمل کرنے والے نوجوانوں میں اسناد اور ایوارڈز تقسیم کیے۔صوبائی وزیر کی موجودگی میں پولیس ڈیپارٹمنٹ اور عدن آئی ٹی سینٹر کے مابین ایک معاہدہ بھی طے پایا، جس کے تحت پولیس شہدا کے بچوں کو مفت تربیت فراہم کی جائے گی جبکہ حاضر سروس پولیس ملازمین کے بچوں کو 50 فیصد رعایت دی جائے گی۔

(جاری ہے)

مفاہمتی یادداشت پر ایم ڈی عدن آئی ٹی سینٹر ابرار احمد اور ڈی ایس پی ہیڈ کوارٹر نعیم گجر نے دستخط کیے۔

تقریب سے خطاب کرتے ہوئے چوہدری شافع حسین نے کہا کہ پاکستان کا مستقبل معیاری فنی تعلیم کے فروغ سے وابستہ ہے۔ ملک کی 60 فیصد سے زائد آبادی نوجوانوں پر مشتمل ہے، جنہیں جدید علوم سے آراستہ کر کے ملک و قوم کی تقدیر بدلی جا سکتی ہے۔ انہوں نے کہا کہ نیلسن منڈیلا نے بالکل درست کہا ہے کہ علم طاقت ہے، اسی لیے جدید علوم نوجوانوں کے ذہنوں کو وسعت دیتے ہیں۔

صوبائی وزیر نے کہا کہ وزیرِاعلی پنجاب کے فراہم کردہ فنڈز سے ٹیوٹا اداروں کی لیبز کو اپ گریڈ کیا گیا ہے اور ان اداروں میں چینی، جرمن، جاپانی، عربی، کوریائی اور دیگر زبانوں کے کورسز بھی شروع کروائے گئے ہیں۔ انہوں نے مزید کہا کہ گجرات میں عالمی معیار کا آرٹیفیشل انٹیلیجنس کالج قائم کیا جائے گا۔چوہدری شافع حسین نے اس موقع پر کہا کہ کچھ عناصر سوشل میڈیا پر پاک فوج کے خلاف منفی پروپیگنڈا کر رہے ہیں، لیکن ہماری بہادر افواج کی بدولت ہی ہم اپنے گھروں میں سکون کی نیند سوتے ہیں۔

آئی ٹی سے وابستہ نوجوان پاک فوج کے خلاف کسی بھی منفی پروپیگنڈے پر کڑی نظر رکھیں۔انہوں نے عدن آئی ٹی سینٹر کی تعریف کرتے ہوئے کہا کہ یہ ادارہ نوجوانوں کو جدید علوم سے آراستہ کرنے میں اہم کردار ادا کر رہا ہے۔ یہاں پولیس کے علاوہ صحافیوں کے بچوں کو بھی 50 فیصد رعایت کے ساتھ تربیت فراہم کی جا رہی ہے۔ صوبائی وزیر نے ادارے میں قائم کی گئی جدید لیب کا افتتاح بھی کیا۔تقریب میں مسلم لیگ سٹی گجرات کے صدر علی ابرار جوڑا، اسکل ڈویلپمنٹ سے وابستہ شخصیات اور طلبہ و طالبات کی بڑی تعداد نے شرکت کی۔