Live Updates

لاہورچیمبرآف کامرس نے خیبرپختونخوا کے مصیبت زدہ بھائیوں کیلئے ہنگامی فنڈ قائم کردیا

اتوار 17 اگست 2025 17:10

لاہور (اُردو پوائنٹ اخبارتازہ ترین - اے پی پی۔ 17 اگست2025ء) لاہور چیمبر آف کامرس اینڈ انڈسٹری کے صدر میاں ابوذر شاد نے پاکستان کی کاروباری برادری سے پرزور اپیل کی ہے کہ خیبرپختونخواہ کے مصیبت زدہ بھائی بہنوں کی مدد کے لیے آگے بڑھیں اور متحد ہوکر زیادہ سے زیادہ تعاون کریں۔صدر لاہور چیمبر نے کہا کہ خیبرپختونخواہ میں آنے والا حالیہ سیلاب تاریخ کا بدترین سانحہ ہے جس نے ہزاروں خاندانوں کو اجاڑ کر رکھ دیا ہے۔

انہوں نے کہاکہ ہمارے سینکڑوں بھائی، بہنیں اور معصوم بچے شہید ہوچکے ہیں جبکہ سینکڑوں ابھی تک لاپتہ ہیں، متاثرین کا مال مویشی، گھر بار ، روزگار سب کچھ پانی کی نذر ہو گیا اور وہ اس وقت انتہائی اذیت میں مبتلا ہیں۔انہوں نے بتایا کہ لاہور چیمبر آف کامرس اینڈ انڈسٹری کی جانب سے فوری طور پر 25 لاکھ روپے جبکہ ذاتی طور پر ان کی جانب سے 5 لاکھ روپے اور مجموعی طور پر 30 لاکھ روپے کا فنڈ قائم کیا گیا ہے، اس فنڈ سے ابتدائی طور پر 10 لاکھ روپے کی ادویات جبکہ باقی رقم سے اشیائے خورونوش، کپڑے اور دیگر ضروری سامان فوری طور پر خیبرپختونخواہ بھجوایا جائے گا تاکہ متاثرین کی فوری ضرورت پوری ہوسکے۔

(جاری ہے)

انہوں نے لاہور سمیت پورے ملک کی تاجر برادری اور مخیر حضرات سے اپیل کی کہ وہ اپنے عطیات، صدقات اور دیگر امدادی سامان لاہور چیمبر کو فراہم کریں تاکہ ان کی بروقت ترسیل خیبرپختونخواہ کے متاثرین تک یقینی بنائی جاسکے۔میاں ابوذر شاد نے کہا کہ کوشش ہے کہ کم از کم ایک کروڑ روپے کی امداد خیبرپختونخواہ کی صوبائی حکومت کے حوالے کی جائے تاکہ وہاں کے متاثرہ خاندانوں کی بحالی میں عملی مدد فراہم کی جاسکے۔انہوں نے کہا کہ یہ وقت ذاتی یا گروہی مفاد کا نہیں بلکہ پاکستانی بننے کا ہے، اگر ہم سب متحد ہوکر مدد کریں تو متاثرین کی مشکلات کم کی جاسکتی ہیں۔