کراچی‘ کنٹینر نذر آتش کرنے کے مقدمے میں 3 گواہوں نے آفاق احمد کو شناخت کرنے سے انکار کردیا

گواہوں نے عدالت میں انکشاف کیا کہ انہوں نے آفاق احمد کیخلاف ایف آئی آر کا اندراج یا بیان نہیں دیا

پیر 18 اگست 2025 15:27

کراچی(اُردو پوائنٹ اخبارتازہ ترین - این این آئی۔ 18 اگست2025ء) انسداد دہشتگردی کی خصوصی عدالت میں لانڈھی میں کنٹینر کو نذر آتش کرنے کے مقدمے میں 3 گواہوں نے اپنی گواہی میں آفاق احمد کو شناخت کرنے سے انکار کردیا۔کراچی سینٹرل جیل انسداد دہشتگردی کمپلیکس میں خصوصی عدالت کے روبرو لانڈھی میں کنٹینر کو نذر آتش کرنے کے مقدمے کی سماعت ہوئی۔

چئرمین مہاجر قومی موومنٹ آفاق احمد و دیگر ملزمان پیش ہوئے۔مدعی مقدمہ دانش سمیت 3 گواہوں نے اپنی گواہی میں آفاق احمد کو شناخت کرنے سے انکار کردیا۔گواہوں نے عدالت میں انکشاف کیا کہ انہوں نے آفاق احمد کیخلاف ایف آئی آر کا اندراج یا بیان نہیں دیا۔مدعی مقدمہ دانش سمیت تینوں گواہ پولیس کو دیئے گئے بیانات سے مکر گئے۔

(جاری ہے)

گواہوں نے کہا کہ ہمیں علم نہیں کہ آفاق احمد کی ایماء پر کنٹینر کو نذر آتش کیا گیا، آفاق احمد کیخلاف مقدمہ درج نہیں کرایا، آفاق احمد کیخلاف کوئی بیان نہیں دیا، پولیس نے سادے کاغذ پر سائن لئے، مدعی مقدمہ دانش اور 2 پولیس اہلکاروں سمیت 5 گواہوں کے بیانات قلمبند کرلیئے گئے۔

عدالت نے آئندہ سماعت پر مزید گواہوں کو طلب کرتے ہوئے سماعت 25 اگست تک ملتوی کردی۔پراسیکیوشن کے مطابق آفاق احمد نے آڈیو میسج کے ذریعے کارکنوں کو اکسانے کی کوشش کا الزام ہے۔ آفاق احمد کی ایماء پر کنٹینر نذر آتش ہوا۔ کنٹینر سے چینی کی بوریاں بھی چوری ہوئیں۔ملزمان نے تسلیم کیا کہ کنٹینر جلانے کا حکم آفاق احمد نے دیا تھا۔ آفاق احمد و دیگر کیخلاف لانڈھی تھانے میں مقدمہ درج ہے۔