صوبائی وزیر اقلیتی امور رمیش سنگھ اروڑہ کی ٹیکسلا آمد

باسکٹ بال لیگیسی ٹرافی 2025 کے فائنل میں بطور مہمان خصوصی شرکت صوبائی وزیر نے لاہور کی ٹیم کو فائنل جیتنے پر ٹرافی اور انعامات سے نوازا

پیر 18 اگست 2025 17:17

لاہور (اُردو پوائنٹ اخبارتازہ ترین - این این آئی۔ 18 اگست2025ء)پیس ایمبیسڈر سوسائٹی اور کرسچن ہسپتال کے اشتراک ٹیکسلا میں باسکٹ بال لیگیسی ٹرافی 2025 کے فائنل میچ میں صوبائی وزیر اقلیتی امور رمیش سنگھ اروڑہ نے خصوصی طور پر شرکت کی اور جیتنے والی ٹیم کو انعامات سے نوازا۔ تفصیل کے مطابق فائنل میچ لاہور اور اسلام آباد کی ٹیموں کے درمیان کھیلا گیا، جس میں لاہور نے زبردست کھیل کا مظاہرہ کرتے ہوئے 74 کے مقابلے میں 94 پوائنٹس سے کامیابی حاصل کی اور ٹرافی اپنے نام کرلی جبکہ ٹورنامنٹ میں پاکستان کے 6 مختلف شہروں کی ٹیموں نے بھرپور شرکت کی۔

اس موقع پر اراکین صوبائی اسمبلی پنجاب محسن ایوب خان ،عمران الیاس، چیئرمین پریسبیٹیرین میڈیکل بورڈ آف پاکستان مجید ایبل بھی موجود تھے۔

(جاری ہے)

صوبائی وزیر رمیش سنگھ اروڑہ نے فاتح ٹیم کو ٹرافی اور انعامات سے نوازتے ہوئے اپنے خطاب میں کہا کہ وزیراعلیٰ پنجاب مریم نواز شریف کی قیادت میں اقلیتوں کی فلاح و بہبود کے لیے متعدد اقدامات جاری ہیں۔

صوبائی سطح پر اقلیتوں کی مذہبی عبادت گاہوں کی تزئین و آرائش ہو رہی ہے، جبکہ مختلف کھیلوں کی سرگرمیوں کا انعقاد کیا جا رہا ہے تاکہ نوجوانوں کو صحت مند مواقع فراہم کیے جا سکیں۔ صحت مند پنجاب ہی ترقی کا ضامن ہے۔ اگر کھیلوں کے میدان آباد ہوں گے تو عدم برداشت اور منفی رویوں کی حوصلہ شکنی ہوگی۔ بڑھتی آبادی اور شہروں کے پھیلاؤ کے باعث کھیلوں کی سرگرمیاں محدود ضرور ہوئیں لیکن اب ہم سب کو مل کر کھیلوں کے میدانوں کو دوبارہ آباد کرنا ہوگا۔

چیئرمین پریسبیٹیرین میڈیکل بورڈ آف پاکستان مجید ایبل نے اپنے مختصر خطاب میں کہا کہ ٹیکسلا میں باسکٹ بال ٹورنامنٹ کا انعقاد اس بات کا ثبوت ہے کہ کھیل امن، ہم آہنگی اور کمیونٹی کی بہتری کا بہترین ذریعہ ہیں۔ نوجوانوں کی بھرپور شرکت خوش آئند ہے اور اس جذبے کو مزید آگے بڑھانے کی ضرورت ہے۔تقریب میں بڑی تعداد میں شائقین، مقامی رہنما اور سماجی شخصیات شریک ہوئیں، جنہوں نے فاتح ٹیم کو زبردست خراجِ تحسین پیش کیا اور اس بات پر زور دیا کہ کھیلوں کی ایسی سرگرمیاں معاشرتی ہم آہنگی اور نوجوانوں کی مثبت نشوونما کے لیے ناگزیر ہیں۔