لاہورہائیکورٹ کا شہری کی عدم بازیابی کیس میں آر پی او کو ہدایت

عدالت نے جیو فینسنگ اور موبائل ڈیٹا ریکارڈ طلب کیا، 26 ستمبر تک مہلت دی

پیر 18 اگست 2025 21:38

لاہور (اُردو پوائنٹ اخبارتازہ ترین - آن لائن۔ 18 اگست2025ء) لاہور ہائیکورٹ نے شہری کی عدم بازیابی کیس میں آر پی او گوجرانولہ کو براہِ راست نگرانی کی ہدایت دیتے ہوئے 26 ستمبر تک مہلت دے دی۔ عدالت نے موبائل فون ڈیٹا اور جیو فینسنگ کا ریکارڈ بھی طلب کر لیا۔ سماعت کے دوران جسٹس فاروق حیدر نے آر پی او گوجرانولہ طیب حفیظ چیمہ کی کارکردگی کو سراہتے ہوئے کہا کہ وہ محض جمع تفریق نہیں کرتے بلکہ عملی اقدامات اٹھاتے ہیں۔

کیس کی سماعت شہری عثمان علی کی جانب سے دائر درخواست پر ہوئی، جس میں مغوی علی حسن کی عدم بازیابی پر کارروائی کی گئی۔ عدالت کے روبرو آر پی او گوجرانولہ طیب حفیظ چیمہ، ڈی پی او منڈی بہاوالدین وسیم احمد اور ڈی پی او گجرات پیش ہوئے۔ آر پی او نے اب تک کیے گئے اقدامات کی رپورٹ پیش کرتے ہوئے بتایا کہ 13 مقامی افراد کے بیانات قلمبند کیے جا چکے ہیں۔

(جاری ہے)

جسٹس فاروق حیدر نے استفسار کیا کہ اغوا کی رات کسی کیمرے میں کوئی گاڑی ریکارڈ ہوئی یا نہیں اور کیا ٹاور ڈیٹا سے ملنے والی معلومات چیک کی گئیں۔ ڈی پی او منڈی بہاوالدین نے مؤقف اختیار کیا کہ مغوی کے زیر استعمال چار موبائل نمبر بند ہیں اور جیو فینسنگ ڈیٹا فی الحال دستیاب نہیں۔آر پی او گوجرانولہ نے کہا کہ ٹاور ڈیٹا کے حصول کے لیے مزید وقت درکار ہے کیونکہ لاکھوں نمبرز سامنے آئیں گے۔

عدالت نے ہدایت کی کہ آر پی او ذاتی طور پر معاملے کی نگرانی کریں جبکہ متعلقہ اضلاع کے ڈی پی اوز کوششیں تیز کریں۔عدالت نے ریمارکس دیے کہ یہ اپنی نوعیت کا منفرد کیس ہے کیونکہ ایک طرف شہری کے اغوا کا مقدمہ درج ہے جبکہ دوسری جانب اسے اشتہاری بھی قرار دیا گیا ہے۔ عدالت نے مغوی کی بازیابی کے لیے براہِ راست اقدامات کی ہدایت دیتے ہوئے سماعت 26 ستمبر تک ملتوی کر دی۔