پاکستانی نژاد کمیونٹی دونوں ممالک کے درمیان ایک پل کا کردار ادا کرتی ہے،اسحاق ڈار

پیر 18 اگست 2025 22:18

اسلام آباد(اُردو پوائنٹ اخبارتازہ ترین - آن لائن۔ 18 اگست2025ء) نائب وزیرِاعظم اوروزیرِ خارجہ محمد اسحاق ڈارنے برطانیہ سے پارلیمانی روابط کو مزید فروغ دینے کے عزم کا اعادہ کرتے ہوئے کہا ہے کہ پاکستانی نژاد کمیونٹی دونوں ممالک کے درمیان ایک پل کا کردار ادا کرتی ہے، جو باہمی فہم و فراست، ثقافتی تبادلوں اور عوامی روابط کو فروغ دیتی ہے۔ وزیرِ خارجہ سینیٹر محمد اسحاق ڈار نے برطانوی پارلیمنٹ کے پاکستانی نژاد اراکینِ پارلیمنٹ محمد یاسین، طاہر علی، عمران حسین، ایوب خان اور عدنان حسین سے مفید ملاقاتیں کیں۔

نائب وزیرِاعظم نے پاکستان اور برطانیہ کے درمیان تاریخی و ثقافتی تعلقات کو اجاگر کیا، جنہیں برطانیہ میں مقیم متحرک پاکستانی کمیونٹی مزید مضبوط بناتی ہے۔

(جاری ہے)

انہوں نے کہا کہ پاکستانی نژاد کمیونٹی دونوں ممالک کے درمیان ایک پل کا کردار ادا کرتی ہے، جو باہمی فہم و فراست، ثقافتی تبادلوں اور عوامی روابط کو فروغ دیتی ہے۔سینیٹر ڈار نے برطانیہ کے ساتھ دو طرفہ پارلیمانی روابط کو مزید وسعت دینے کے پاکستان کے عزم کا اعادہ کیا۔

انہوں نے اس بات پر زور دیا کہ ایسے روابط جمہوری تجربات، بین الاقوامی بہترین طریقہ کار اور بنیادی جمہوری اقدار کے تبادلے میں مددگار ثابت ہوتے ہیں، جو دونوں ممالک میں جمہوری اداروں کی ترقی و استحکام کے لیے نہایت اہم ہیں۔نائب وزیرِاعظم/وزیرِ خارجہ نے بھارتی غیر قانونی طور پر مقبوضہ جموں و کشمیر (IIOJK) میں انسانی حقوق کی سنگین خلاف ورزیوں کو اجاگر کرنے کے لیے برطانوی اراکینِ پارلیمنٹ کی کوششوں کو بھی سراہا۔ انہوں نے ان کی مستقل کاوشوں کو خراجِ تحسین پیش کیا جو وہ برطانوی پارلیمنٹ میں آواز بلند کرنے اور برطانیہ میں اس انسانی المیے کے بارے میں عوامی آگاہی بڑھانے کے لیے کر رہے ہیں