ٹاپ اینڈ ٹی ٹوئنٹی سیریز ،پاکستان شاہینز نے میلبرن رینی گیڈز کو 73 رنز سے ہرادیا،عبدالصمد کی جارحانہ سنچری

پیر 18 اگست 2025 23:18

ڈارون(اُردو پوائنٹ اخبارتازہ ترین - این این آئی۔ 18 اگست2025ء) پاکستان شاہینز نے ٹاپ اینڈ ٹی ٹوئنٹی سیریز کے اپنے تیسرے میچ میں میلبرن رینی گیڈز کو 73 رنز سے شکست دے دی،اس میچ کی نمایاں بات عبدالصمد کی شاندار ناقابل شکست سنچری تھی۔یہ پاکستان شاہینز کی تین میچوں میں دوسری کامیابی ہے۔اس نے پہلے میچ میں بنگلہ دیش اے کو 79 رنز سے شکست دی تھی جبکہ دوسرے میچ میں اسے پرتھ سکارچرز کے خلاف 2 وکٹوں سے شکست کا سامنا کرنا پڑا تھا۔

پیر کے روز کھیلے گئے میچ میں میلبرن رینی گیڈز نے ٹاس جیت کر پاکستان شاہینز کو پہلے بیٹنگ دی جس نے 20 اوورز میں 5 وکٹوں کے نقصان پر178 رنز بنائے۔ میلبرن رینی گیڈز کی ٹیم 179 رنز کے ہدف کے تعاقب میں19 اعشاریہ 2 اوورز میں 105 رنز بناکر آؤٹ ہوگئی۔پاکستان شاہینز کی اننگز میں دونوں اوپنرز یاسرخان اور خواجہ نافع بغیر کوئی رن بنائے آؤٹ ہوگئے۔

(جاری ہے)

محمد فائق 21 اور معاذ صداقت 4 رنز بناکر آؤٹ ہوئے تو پاکستان شاہینز کا سکور 4 وکٹوں پرصرف 55 رنز تھا۔اس موقع پر عبدالصمد نے ایک بار پھر جارحانہ بیٹنگ کرتے ہوئے 63 گیندوں پر 6 چھکوں اور 6 چوکوں کی مدد سی110 رنز ناٹ آؤٹ کی شاندار اننگز کھیلی جس نے اپنی ٹیم کی پوزیشن بہتر بنادی۔ انہوں نے بنگلہ دیش اے کے خلاف بھی جارحانہ نصف سنچری بنائی تھی۔

عبدالصمد اور کپتان محمد عرفان خان نے پانچویں وکٹ کی شراکت میں 109 رنز کا اضافہ کیا۔ عرفان خان ایک چھکے اور ایک چوکے کی مدد سی23 رنز بناکر آؤٹ ہوئے۔میلبرن رینی گیڈز کے بیٹرز پاکستان شاہینز کے بولرز کا مقابلہ کرنے سے قاصر رہے۔ جوشوآ براؤن ایک چھکے اور پانچ چوکوں کی مدد سے 36 رنز کے ساتھ ٹاپ سکورر رہے۔معاذ صداقت نے 22 رنز دے کر 3 وکٹیں حاصل کیں۔فیصل اکرم نے دو جبکہ مبصر خان سعد مسعود وسیم جونیئر اورعبید شاہ نے ایک ایک کھلاڑی کو آؤٹ کیا۔پاکستان شاہینز اپنا چوتھا میچ منگل 19 اگست کو کنگزمین کے خلاف کھیلے گی۔