بھارتی فوج میں خواتین سے زیادتی کے بڑھتے ہوئے واقعات، اعلیٰ افسروں کواستثنیٰ حاصل

سرینگر(اُردو پوائنٹ اخبارتازہ ترین - این این آئی۔ 19 اگست2025ء)بھارتی فوج میں خواتین کی جنسی ہراسانی اور زیادتی کے بڑھتے ہوئے واقعات نے ادارے کی ساکھ پر سنگین سوالات کھڑے کر دیے ہیں۔کشمیرمیڈیاسروس کے مطابق تازہ ترین واقعے میں ایک کرنل نے اپنی اہلیہ کے ساتھ جنسی زیادتی کا انکشاف کیاہے ۔ جس میں بھارتی فوج کے متعدد اعلیٰ افسران ملوث ہیں۔

ریٹائرڈ کرنل امیت کمار کے مطابق انکی اہلیہ کو اوڈیشہ کے ہسپتال میں اعلیٰ فوجی افسروں کی طرف سے زیادتی کا نشانہ بنایاگیا۔ کرنل کی طرف سے پیش کئے گئے ویڈیو شواہد اور باضابطہ ایف آئی آر میں تین بریگیڈیئرز اور ایک لیفٹیننٹ کرنل کو نامزد کئے جانے کے باوجود فوج کی انٹرنل انکوائری میں انہیں الزامات سے بری کردیاگیاہے۔کرنل امیت کمارنے بھارتی فوج کی قیادت اور پولیس پر ساز باز کا الزام لگاتے ہوئے کہا کہ فوج میں اعلیٰ افسروں کی طرف سے خواتین سے جنسی زیادتی کے واقعات طویل عرصے سے جاری ہیں اور متاثرہ خواتین اور خاندانوں کو ڈرا دھمکا کر خاموش کردیا جاتا ہے۔

(جاری ہے)

واضح رہے کہ بھارتی فوج میں خواتین سے زیادتی کا یہ کوئی پہلا واقعہ نہیں ہے ۔2015میں راجستھان میں آرمی کی سگنل کور کی ایک نوجوان خاتون افسر نے اپنے کمانڈنگ افسر کے خلاف جنسی ہراسانی اور بدسلوکی کی شکایت درج کرائی تھی۔ تاہم مذکورہ افسر کے خلاف کارروائی میں جان بوجھ کر کئی ماہ کی تاخیر کی گئی اور مجبورا ،خاتون افسر کو وزیر دفاع سے انصاف کی اپیل کرنی پڑی ۔

اس سے قبل 2008میں آرمی سپلائی کور کی کیپٹن پونم کور نے سینئر افسران پر ذہنی اور جنسی طور پر ہراساں کرنے کا الزام لگایا تھا ۔ تاہم اعلیٰ افسروں کو بچانے کیلئے تحقیقات میں کیپٹن کے تمام الزامات کو جھوٹ پر مبنی قراردیدیاگیاتھا۔بھارتی فوج مقبوضہ جموں و کشمیر میں بھی بڑے پیمانے پر جنسی تشدد اورعصمت دری کے واقعات میں ملوث ہے۔ 1991میں بھارتی فوج نے ضلع کپواڑہ کے علاقے کنن پوش پورہ میں تلاشی کی کارروائی کے دوران درجنوں کشمیری خواتین کی اجتماعی عصمت دری کی تھی۔

اگرچہ اس واقعے کی ایف آئی آر صرف 23متاثرہ خواتین کی طرف سے درج کرائی گئی تاہم انسانی حقوق کے گروپوں کے مطابق متاثرہ خواتین کی اصل تعداد 100کے قریب ہے،جوآج بھی انصاف کی منتظر ہیں ۔ان سنگین واقعات کی تحقیقات کے لیے ایک آزاد اور شفاف نظام کی عدم موجودگی سے بھارتی فوج کو ان گھنائونے جرائم کی پردہ پوشی کا موقع فراہم ہوتا ہے۔ کرنل امیت کمار کی اہلیہ سے اعلیٰ افسروں کی زیادتی کے واقعے سے ایک بار پھر ثابت ہوگیاہے کہ بھارتی فوج میں خواتین کے تحفظ اور انہیں انصاف کی فراہمی کے دعوے صرف کھوکھلے ہیں۔